“Шрек” мультфильмидаги Эшак образининг прототипига айланган Перри лақабли эшак АҚШнинг Калифорния штатида вафот этди. Унинг ўлими 2 январь куни Пало Алтодаги эшакларга ғамхўрлик қилувчи Barron Park Donkey Project томонидан эълон қилинди. Перри 30 ёшдан ошган эди.
Ҳайвон ламинит — туёқлар яллиғланишидан азият чекар эди, шу сабабли узоқ вақт давомида курашиб келаётган оғриқдан халос қилиш учун Перри бир умрга ухлатиб қўйилди. У 1997 йилдан бери Пало Алто шаҳридаги эшаклар бошпанасида яшаб келаётган эди.
“Қарийб бир ой давомида Перри уч оёқда ҳаракат қилар ва доимо бир оёғини кўтарган ҳолда турар эди. Эшака кўп марта кучли оғриқ қолдирувчи дорилар берилган” деди ҳайвонлар бошпанаси ходими Женни Киратли.
Оғриқни енгиллаштириш учун Перрига илиқ массажлар қилинган, лазер терапияси ва игна санчиш усулидан фойдаланилган. Йил бошида эса унинг ҳолати яхшиланмаётгани маълум бўлган.
“Узоқ умри давомида Перри фильмдаги сўзловчи Эшак образига қўшган ҳиссаси орқали маҳаллий ҳамжамият ва бошқа кўпчиликнинг қалбини забт этди”, дейилади Barron Park Donkey Project баёнотида.
Перрининг 30 ёшга тўлиши муносабати билан эшакларга ғамхўрлик қилувчи паркка кўплаб одамлар, жумладан, Пало Алто шаҳри мэри Грир Стоун ҳамда бошқа сиёсатчилар ташриф буюрган. Шунингдек, маҳаллий ҳокимият ҳайвоннинг тиббий харажатлари учун 10 минг доллар ажратган.
Перри нафақат қувноқ ва қизиқарли ҳайвон экани, балки “Шрек” мультфильмидаги Эшак образи прототипи сифатида ҳам танилган эди. Ушбу қаҳрамонга актёр Эдди Mёрфи овоз берган.
Эслатиб ўтамиз, XXI асрнинг энг нуфузли ва таниқли анимацион франшизаларидан бири бўлган “Шрек” фильмида Эшак образи энг эсда қоларли қаҳрамонлардан бирига айланган. Франшизанинг бешинчи қисми 2025 йилда чиқиши ҳам мумкин, бу ҳақда актёр Эдди Mёрфи Collider нашрига берган интервьюсида Эшак образига қайта овоз бериши ҳақида ҳам тўхталиб ўтган эди.
Изоҳ (0)