Буюк Британиянинг Уорикшир шаҳрида 250 минг долларлик Range Rover ўғирлаб кетилди. Машина эгаси уни ўғрилик содир бўлишидан 60 соат аввал харид қилган эди. Автосалон эса унга Range Rover’нинг айнан шу модели илғор хавфсизлик тизимига эга эканлигига ишонтирган.
Жон (фамилиясини ошкор этишни истамаган) 2024 йил 13 декабрда Буюк Британияда ишлаб чиқарилган 550 та моделдан бири бўлган чекланган тираждаги Range Rover учун ҳужжатларни расмийлаштирди. Машина уқаловчи ўриндиқлар, 4D тактил аудиотизим ҳамда янгиланган хавфсизлик тизими билан жиҳозланган.
Эртаси куни тахминан соат 15:30 да Жон автоуловни автосалондан олган ва 60 соатдан камроқ вақт ўтгач, машина ўғирлаб кетилган. Воқеа 17 декабрь куни эрта тонгда содир бўлган. Камералардаги видеотасвирга кўра, машинани ўғирлаш учун атиги 15 дақиқа кифоя бўлган. Уни уч киши қулфини 10 дақиқада бузган ва машинага ўтириб кетган.
Янги Range Rover Жон хонадонининг ҳовлисида қолдирилган эди. Безорилар машинани қандай қилиб ҳайдаб кетгани ҳозирча номаълум.
Ўша куни Жон эрта тонг соат 3:00 да уйғонган. Бу вақтга қадар у машинага ўрнатилган трекерни кузатувчи компаниядан бир нечта қўнғироқларни ўтказиб юборган. Сўнг Жон деразасидан қараб машина йўқлигини аниқлаган.
Натижада Жон Jaguar Land Rover бош директорига шикоят хати ёзди ва машинасининг ўғирланиши ҳақида маълумот бериб, “энг сўнгги технологияларга асосланган хавфсизлик тизими” умуман ишламаслиги ҳақида шикоят билдирди.
JLR мижозларга хизмат кўрсатиш маркази унинг хатига қуйидагича жавоб берди:
“Ҳар бир машинани масъулият билан ишлаб чиқарувчи сифатида биз шу каби ўғирликларнинг олдини олиш турли хавфсизлик тизимларини жорий қилдик. Бироқ фақат ушбу тизимига таянган ҳолда машинадан фойдаланиш мумкин эмас. Чунки автотранспорт воситаларини ўғирлаш каби жиноий ишлар транспорт воситалари эгалари дуч келиши бўлган кундалик хавфлардан биридир. Биз бундай ҳолатда ҳеч қандай жавобгарликни бўйнимизга олмаймиз ва шикоятингизни кўриб чиқмаймиз”.
Шу тариқда машина ҳам топилмади. Daily Mail нашри қайд этганидек, автомашиналарни ўғирлаб, сўнг уларни Африка, Шарқий Европа ва Яқин Шарққа олиб кетиш каби жиноятлар Буюк Британияда жуда кенг тарқалган.
Изоҳ (0)