Қўшма Штатларда суратга олинган фильм ва сериалларда кир ювиш учун махсус марказларни кўришингиз мумкин. Америкада кир ювиш ва қуритиш жойлари (“laundromats” ёки “coin laundries”) жуда кенг тарқалган бўлиб, аҳолининг катта қисми ундан фойдаланади. Улар одатда квартирасида кир ювиш машиналари йўқ ёки кичик бўлган одамлар учун қулай. Бу одат қаердан пайдо бўлган ва нега аҳоли кир ювиш машиналаридан уйда фойдаланмайди?
Кир ювиш машинаси учун уйда жой ва шароит йўқ
Кўплаб Америка квартираларида, айниқса, йирик шаҳарларда, кир ювиш машинаси учун алоҳида жой ажратилмайди. Бу уй-жойнинг дизайни билан боғлиқ: эски уйларда кир машина учун алоҳида сув қувури ўтказиш қимматга тушади.
Коммунал чиқимларни тежаш
АҚШда сув ва электр энергиясининг нархи юқори бўлгани туфайли кир ювиш марказлари пулни тежаш имконини беради: бу ерда кир машинасини ҳар бир юклаганлик учун пул тўланади. Бундан ташқари, умумий кир ювиш хоналари сув ва электр энергиясидан маиший машиналарга қараганда тежамкорроқ фойдаланади.
Бошқа томондан, ижарага берувчи баъзи шахслар уйда кир ювиш машинаси ўрнатишни тақиқлайди, чунки уй эгалари сув тошиши ва электр токида қисқа туташувлар содир бўлишидан хавотир олади.
Бир маконда муқим қолмаслик маданияти
Америкаликлар тез-тез уй-жойини алмаштиради, шунинг учун кир ювиш машинаси ёки қуритгич каби катта техникаларни сотиб олиш ва ташиш керакcиз муаммо сифатида қабул қилинади. Кир ювиш марказлари эса вақтинчалик яшайдиганлар учун қулайлик яратади.
Кир ювиш марказлари қандай ташкил этилган?
Ўз-ўзига хизмат кўрсатиш: Одамлар ўз кирларини олиб келиб, машина ва қуритгичларни ишлатишади. Кир машиналар одатда тангалар ёки карталар билан ишлайди.
Тўлиқ хизмат: Баъзи марказлар ювиш, қуритиш ва ҳатто дазмоллаш хизматларини ҳам таклиф қилади. Бу эса қўшимча ҳақ эвазига амалга оширилади.
Қуритиш хизмати: Баъзи кир ювиш марказлари профессионал тозалаш (dry cleaning) хизматларини ҳам тақдим этади.
Имкониятлар
Замонавий кирхоналари кўпинча Wi-Fi, кофе ва егулик автоматлари ва ҳатто болалар учун ўйин майдончалари билан жиҳозланган. Барчаси фойдаланувчилар вақтни мароқли ўтказишига ёрдам беради. Одатга кўра, кир ювиш марказлари асосан кўп қаватли уйларнинг ерости қаватида ёки супермаркетларга яқин жойларда жойлашган бўлади.
Техника нархи
Ўзбекистонда сотиладиган кир ювиш машиналари аҳоли учун қулай нархларда, аммо АҚШда бундай маиший техника қиммат қулайликдир.
Қуритиш машиналаридан фойдаланиш анъанаси
Америка маданиятига кўра, кийимлар дорга осиб қуритилмайди. Аксарият аҳоли электр қуритгичлар ёки қуритиш машиналарини афзал кўради, чунки улар кийимларни тез ва самарали қуритиш имконини беради. Уйда қуритгични ўрнатиш қўшимча вентиляцион тизим ишлаб чиқишни талаб қилади, шу сабабли аҳоли кир ювиш марказларига боришни маъқул кўради.
Ижтимоий норма
Кўпгина америкаликлар учун кир ювиш марказларига бориш одатий ҳол бўлиб, бу жараён ноқулайлик сифатида қабул қилинмайди. Аксинча, кийимларингиз ювилаётганда дам олиш, китоб ўқиш, мулоқот қилиш ёки ҳатто ноутбукда ишлаш учун қулай бўлиши мумкин. Социологларнинг фикрича, бу америкаликлар учун доимий ташвишлардан дам олиш ва медитация қилиш жойи ҳам ҳисобланади.
Изоҳ (0)