Ўзининг улкан хайрия тадбирлари билан танилган Жимми Дональдсон ёки Жаноб Бист (Mr. Beast) исмли YouTube блогери навбатдаги хайрли ишга қўл урди. Ижтимоий тармоқда ҳеч кимникига ўхшамас контент яратувчи блогер 100 та уй қуриш ташаббусини амалга оширди ва уларни муҳтож оилаларга совға қилди.
Ҳозирда Жаноб Бист ўзининг кенг кўламли ва йирик хайрия тадбирлари билан YouTube платформасидаги энг машҳур блогер ҳисобланади. У блогерлик фаолиятидан топган маблағига минглаб инсонларга моддий ёрдам бериб келмоқда, жумладан, Жаноб Бист минглаб одамларнинг кўриш қобилиятини тиклаш ва катарактани олиб ташлаш бўйича операция харажатларини қоплаган. Шунингдек, у 3 миллион доллардан ортиқ пулларни кам таъминланган шахсларга тарқатган.
Блогер Netflix’нинг машҳур “Кальмар ўйини” сериали асосида ташкил этган ўйинида 456 000 долларлик соврин учун юзлаб инсонлар курашган. Унинг видеоси 424 миллион мартадан ортиқ томоша қилинган.
Жаноб Бист ўзининг қилган саноқсиз эзгу саъй-ҳаракатларига қарамай, кўплаб интернет фойдаланувчилари томонидан танқидга учрайди. YouTube орқали тўпланган катта бойлигини ижтимоий тенгсизликка қарши курашда ишлатгани учун блогерни ёмонлайдиган шахслар ҳам йўқ эмас. Бундай фикрларга Жимми Дональдсон қуйидагича жавоб берган:
“Биз инсонларга манфаатли бўлишдан чарчамадик. 1000 та кўз операцияси, 100 та оила учун янги уй, 100 та қудуқ каби хайрия ҳаракатларидан ғазабланиб, буларни мен эмас, аслида, ҳукумат бажариши керак, дейишади. Тўғри, блогерлар бундай масала билан шуғулланиши бугунги кунда ёт нарса. Лекин мен атрофимда бўлаётган ҳодисаларга шунчаки қараб туролмайман”, деб ёзди блогер Х (собиқ Twitter) сайтида.
Танқидчиларнинг сўзларига кўра, бундай фаолиятга асосланган контент яратиш эксплуатация бўлиши мумкин. Бироқ Жаноб Бист буларнинг бари фақат ёрдам бериш ва ўзидан яхшилик қолдириш мақсадида қилинганини таъкидлади ҳамда видеоларидан тушган барча даромадлар шунга ўхшаш янги лойиҳаларни молиялаштиришга сарфланишини айтди.
“Мен маблағларни инсонларга ёрдам бериш учун сарфлайман ва ўлимимдан аввал бор пулимни барчага тарқатишга ваъда бераман. Ҳар бир сўнгги тийинигача бераман”, дейди блогер.
Жаноб Бистнинг сўнгги эзгу ишлари орасида аҳолини ичимлик суви билан таъминлаш вазифаси алоҳида таҳсинга лойиқ. У Африканинг бир неча қашшоқ ерларига ташриф буюриб, у ерда сув олиш учун юзта қудуқ қаздирди. Бундан ташқари, у Кения, Сомали ва Зимбабведаги аҳолига молиявий ёрдам берди.
Изоҳ (0)