Голливуд юлдузи Жонни Депп капитан Жек Читтак қиёфасида кийиниб, Сан Себастьяндаги (Испания) Доностия университети касалхонасида ёш беморлар ҳолидан хабар олди. Бу ҳақда шифохонанинг Х тармоғидаги саҳифасида маълум қилинди.
Актёр болалар онкологияси бўлимидан ташқарига чиқмагунча “Кариб денгизи қароқчилари” франшизасида ўйнаган образидан чиқмади, дейилади El Diario Vasco нашрида. Жек Читтакнинг ташрифи болаларга ҳеч бўлмаганда бир неча дақиқага бошидан кечираётган қийинчиликларни унутишга ёрдам берди, дея қўшимча қилди газета.
Аввал ҳам Депп машҳур қароқчи қиёфасида Ванкувер, Париж, Лондон, шунингдек, АҚШнинг бир қанча шаҳарларидаги шифохоналарнинг болалар бўлимларига ташриф буюрган.
Актёр Жонни Депп охирги марта 2017 йилда “Кариб денгизи қароқчилари: мурдалар эртак айтмайди” фильмида иштирок этди. Сўнг актриса Марго Робби билан суратга олиниши режалаштирилган “Кариб денгизи қароқчилари” фильмининг янги спин-оффи Disney томонидан бекор қилинди. Чунки Голливуд актёри рафиқаси Эмбер Ҳёрд билан боғлиқ можаролар сабаб карьерасида муаммоларга дуч келди. Актёрга айнан шу сабабли янги роллар таклиф қилинмади ва иштирок этган лойиҳаларидан ҳайдалди. Депп судда ғалаба қозонганидан сўнг, продюсерлар ва режиссёрлар яна у билан ҳамкорлик қилишни сўради. Жумладан, Disney Жоннига яна Жек Читтак ролини таклиф қилди, бироқ у кутилмаганда буни рад этди.
Фото: Ванитй Фаир
Сўнгги йилларда Жонни кўп вақтини мусиқа ва тасвирий санъатга бағишлади. 2019 йилда Hollywood Вампирес рок гуруҳининг альбомини чиқарди. 2022 йилда у гитарачи Жефф Бек билан диск ёзди. “18” деб номланган ушбу альбомнинг кўплаб композицияларида Жонни Деппнинг ўзи солист ҳисобланади. 2023 йилда актёр “Жанна Дюбарри” фильмида қирол Людовик XV ролида суратга тушди.
Аввалроқ Жонни Депп жажжи мухлисини даволаб бўлмайдиган юрак касаллигига қарши курашишда қўллаб-қувватлади ва Жек Читтак қиёфасида кийиниб, таъсирчан видеомурожаати ва телефон қўнғироғи билан беморни ҳайратда қолдирган эди.
Изоҳ (0)