Дунёдаги энг машҳур ютубер, америкалик Жеймс Стивен Дональдсон (Mr.Beast) ўзининг навбатдаги видеошоуси учун Мисрнинг энг таниқли эҳромларини ижарага олди. Қадимги меъморий ёдгорликлар ичига кириш, у ерларда изланишлар олиб бориш ва тунаб қолиш учун блогерга 100 соат вақт берилади.
Жеймсдан қўриқланадиган ва давлат муҳофазасига олинган биноларга кириш ва суратга олиш ишлари учун қандай қилиб рухсат олгани ҳақида сўралганда, у Миср ҳукумати билан ҳамкорлик қилаётганини айтди.
Гизадаги эҳромлар мажмуаси ҳақиқатан ҳам турли тадбирлар, концертлар ва ҳатто фестиваллар учун ижарага олиниши мумкин. Фақатгина тўй тадбирлари бундан мустасно. Ижарага берилишдан аввал Миср ҳукумати сўровномаларни ўрганиб чиқади ва катта пул эвазига эҳромларни бир неча кунга топширади.
Хеопс пирамидаси ЮНЕСКО нинг тарихий мерослари рўйхатига киритилган. Ушбу пирамидалар Миср шимолидаги Нил дарёси бўйида жойлашган. Мисрда камида 118 та пирамида маълум, аммо энг машҳур учтаси фиръавнлар исми билан номланган Хеопс, Хафра ва Микерин пирамидалари ҳисобланади.
Mr.Beast айнан шу учта машҳур ёдгорликларга кириш ва уларда суратга олиш учун рухсат олган. Блогер мазкур эҳромлар тарихига оид аввал эълон қилинмаган ноёб кадрларни суратга олишни режалаштирган. Унинг жамоаси доимий равишда профессионал гидлар ҳамроҳлигида бўлади.
“Мен ҳеч қачон пирамидалар ичида бўлмаганман. Мен қадимий эҳромлар сирларини очиб, барча хоналарни, қабрларни бирма-бир ўрганмоқчиман. Ҳозирда қаттиқ ҳаяжондаман, чунки ер остида яширин йўллар ва турли хатарликлар ҳам мавжуд. Бизни айнан нималар кутаётганини тасаввур ҳам қила олмайман. Дарвоқе, жамоамиз кун-у тун пирамида ичида қолади ва деярли 4 сутка давомида эҳромлар бизнинг ихтиёримизда бўлади”, дейди блогер.
Mr.Beast қанча суммага Миср ҳукумати билан шартнома тузилганини сир сақламоқда.
Эслатиб ўтамиз, Mr.Beast экстремал мусобақалар ва қимматбаҳо совринли ўйинларни ташкил қилиши билан машҳур. Унинг YouTube канали 337 миллиондан ортиқ обуначига эга. Мазкур кўрсаткич дунё бўйича рекорд саналади.
Изоҳ (0)