Американинг Hellmann’s номли соуслар ишлаб чиқарувчи компанияси майонез ифоридан илҳомланган ҳолда ноодатий атир тақдим этди, дея хабар бермоқда Europa Plus. Will Levis No.8 атири лимон, қаҳва, мускус, ванил ҳамда майонез ифорларини ўзида бирлаштиради.
“Сизга янги Will Levis No.8 ни тақдим этамиз. Hellmann’s эксклюзив ифорни Tennessee Titans футбол жамоасининг ҳимоячиси Уилл Льюис билан ҳамкорликда ишлаб чиқди ва ҳозирда дунёдаги биринчи “Майонез” деб номланган парфюмга айланди”, дейилади манбада.
Ўтган йили футболчининг қаҳвасига Hellmann майонезини қўшгани акс этган видео ижтимоий тармоқларда тарқалган эди. Бунинг учун компания спортчини бутун умрга етадиган миқдорда соус билан таъминлашга қарор қилди. Льюиснинг ўзи кейинроқ майонез қўшилган қаҳва ичмаслигини ва видеони шунчаки ҳазил учун суратга олганини тан олди.
Шундай бўлса-да, спортчи ўзининг индивидуал хусусиятлари акс этган янги ифорни ишлаб чиқишга жиддий эътибор берди ва Hellmann’s компанияси билан ҳамкорликда ишлади. Шундай қилиб Уилл Льюис парфюмерия амбассадорига айланди.
Ишлаб чиқаришни йўлга қўйишдан аввал компания вакиллари футболчига бир нечта синов шаклидаги атирларни текшириб беришни сўраган. Льюис фикрича, компания янги бренд яратиш масаласини аъло даражада бажарган ва у ўйлагандан ҳам яхшироқ ифор ихтиро қилинган.
Ҳажми 30 мл бўлган Will Levis No.8 атирининг илк партияси бир неча кунда сотилиб кетди. Ҳар бир флаконнинг нархи эса тахминан 80 долларга баҳоланган.
Изоҳ (0)