Тошкент шаҳар ҳокими Шавкат Умурзоқов 14 август куни президент иштирокидаги тақдимотдан сўнг пойтахтда чиқиндиларни қайта ишлаш тизимини рақамлаштириш, чиқиндиларни қайта ишлаш билан шуғулланувчи “Махсустранс” корхонасининг молиявий аҳволи ва бу борадаги режалар ҳақида гапирди.
Ҳоким “Ўзбекистон 24” телеканалига берган интервьюсида чиқиндиларни олиб чиқиб кетиш билан шуғулланувчи “Махсустранс” давлат унитар корхонасининг “молиявий аҳволи жуда ёмон” эканини ҳамда компания 2022−2023 йилларда 45 миллиард сўм зарар кўрганини маълум қилди.
“Маҳаллаларда бир кунлаб, икки кунлаб ахлат қолиб кетар экан ва умуман ахлат соладиган қурилмалар етарли эмас экан. Бунинг ечими фақат рақамлаштириш”, дея таъкидлаган Шавкат Умурзоқов.
Қайд этилишича, Олмазор туманидаги маҳаллаларда чиқинди ташиш жадвалига риоя этилишини назорат қилиш бўйича “Тоза Пойтахт” платформаси синов тариқасида ишга туширилган. 1 сентябрга қадар тизим Тошкент шаҳрининг барча туманларида жорий этилади.
Бундан ташқари, рақамлаштириш орқали ёқилғидан 3 миллиард сўмдан ортиқ иқтисод қилинган, 34 турдаги чиқинди ташиш техникалари харид қилиниб, чиқинди ташувчи ҳайдовчиларнинг ойлик маошлари ойига 4 миллион сўмдан 8 миллион сўмгача оширилган. Натижада чиқиндиларни олиб чиқишнинг кунлик ҳажми қарийб 30 фоизга ошди.
Изоҳ (0)