Шанхайлик қизча онасига тегишли 140 минг долларлик қийматга эга қимматбаҳо тақинчоқларни уйидан ўғирлаб, уларни атиги 8 долларга сотиб юборди. Ўсмир қиз ўзига янги сирға сотиб олиш учун шундай йўл тутган.
Аёл ўзига тегишли нефрит билагузуклар, занжирлар ва бошқа қимматбаҳо буюмлар йўқолганини билиб, полицияга мурожаат қилган. Унинг қизи эса ўзига янги сирға ва кундалик чўнтак пулига эга бўлиш учун заргарлик буюмларини дўконга арзон нархга бериб юборган. Бундан ташқари, қиз уларнинг ҳақиқий қийматини билмаган ва тақинчоқларни қалбаки деб ўйлаган.
“Қизим нима учун тақинчоқларимни сотиб юборганини билмас эдим. Ўша куни у ўзига пул кераклигини айтди. Қизимдан унга қанча кераклигини сўрасам, у 60 юан, деди. Менинг пулларни нима қиласан, деган саволимга:
Лабларига пирсинг қилган дугонамга ҳавасим келди ва мен ҳам шундай қилишни истайман, дея жавоб берди”, қўшимча қилди аёл.
Ҳуқуқ-тартибот идоралари ходимлари унинг аризасини дарҳол кўриб чиқди ва тақинчоқлар сотилган дўконга етиб борди. Улар видеокузатув камераларини текшириб, дўкон раҳбарияти билан боғланишди. Улар ҳам вазиятни тушуниб, тақинчоқларни қайтариб беришди.
“Ўша куни дўкон эгалари уйда йўқ эди, шунинг учун биз улар билан боғланиб, масалани ҳал қилиш учун полиция бўлимига келишларини илтимос қилдик”, деди полиция ходими Фан Гаоцзе.
Ушбу воқеа интернетда жамоатчилик норозилигига сабаб бўлди. Фойдаланувчилар нима учун қимматбаҳо заргарлик буюмларига эга бўлган оилада ота-она фарзандига озгина бўлса ҳам кундалик харажатлар учун пул ажратмаслигини танқид қилди.
Изоҳ (0)