Японияда аҳолини ҳар куни камида бир марта кулишга ундайдиган қарор қабул қилинди

Япониянинг Ямагата префектураси маъмурияти аҳоли кунига камида бир марта бўлса ҳам кулиши керак бўлган қарорни тасдиқлади. Бу ҳақда “Парвила жизни” нашри хабар берди.

Таъкидланишича, мазкур қарор лойиҳаси либерал-демократик партия томонидан илгари сурилган. Депутатлар ташаббусни маҳаллий университетлардан бирининг ўрганиш натижалари билан асослашди. Аниқланишича, тез-тез куладиган одамларда эрта ўлим ва юрак-қон томир касалликлари камроқ кузатилар экан.

Ҳужжатда Ямагата префектураси аҳолиси жисмоний ва психологик саломатликни мустаҳкамлаш учун кунига камида бир марта кулишга чақирилган. Шунингдек, иш берувчилар иш жойларда кулгига тўла муҳит яратишга даъват этилган.

Ямагатада ҳар ойнинг 8-кунини “аҳолининг руҳий ва жисмоний саломатлигини кулги орқали мустаҳкамлаш куни” деб эълон қилинди. Ушбу қарор айрим депутатлар томонидан танқид ҳам қилинган: улар касаллик ёки бошқа сабабларга кўра кулиши қийин бўлган одамларнинг ҳуқуқларини поймол қилиш мумкинлигини таъкидлаган. Шу сабабли одамлар кулишга мажбурланмайди.

“Янги қарорда инсоннинг шахсий қарорига ҳурмат кўрсатилиши таъкидланган”, — дея тушунтирди депутатлардан бири.

Бу каби ташаббуслар аввалроқ Япониянинг бошқа минтақаларида ҳам қўлланилган. Мисол учун, Хоккайдо префектураси 8 августни “Кулги куни” деб эълон қилган, Осакада эса кулги орқали саломатликни мустаҳкамлаш дастурлари ишлаб чиқилган.