Афғонистонда турар жой биноларидаги аёллар кўринадиган тарзда деразаларни ўрнатиш тақиқланди. “Толибон” ҳаракати раҳбари Ҳайбатулла Охундзода тегишли фармонни имзолади.
Фармон матни Афғонистон ҳукуматининг расмий вакили Забиҳуллоҳ Мужоҳид томонидан эълон қилинган. Унга кўра, деразаларни қўшни хонадоннинг ошхонасига ёки одатда аёллар ўтирадиган бошқа жойларга қаратиб қуриш мумкин эмас. Агар уй шундай лойиҳалаштирилган ва унинг деразасидан аёлни кўриш имконияти бўлса, бино эгаси ўз деразалари олдига одам бўйи баландлигидаги девор ўрнатиши зарур.
Тегишли идоралар янги қурилишларни назорат қилишлари керак, токи қўшниларнинг уйларига қараш имконияти йўқлигини таъминласин. “Толибон” ҳокимият тепасига келгач, мамлакатда бир қатор тақиқ ва чекловларни, биринчи навбатда, аёлларга нисбатан жорий эта бошлади.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш,
- аёлларнинг сотувчилари билан савдолашиш,
- акушер ва ҳамшираликка ўқиш,
- аёлларга бир-бири билан гаплашиш тақиқланган.
Канада, Австралия, Германия ва Нидерландия аёллар дискриминацияси туфайли Халқаро судга “Толибон” устидан даъво аризаси билан мурожаат қилмоқчи.
Изоҳ (0)