“Толибон” ҳукумати ҳижоб ўраш қоидаларига риоя қилмагани учун Бомиён вилоятидаги Банди Амир миллий боғига аёлларнинг киришини тақиқлади. Бу ҳақда эзгуликни тарғиб қилиш ва иллатларнинг олдини олиш вазири Муҳаммад Холид Ҳанафийга таяниб, ToloNews хабар берди.
“Рафиқаларимиз ва опа-сингилларимиз токи биз улар учун тартиб-қоидаларни белгиламагунимизча Банди Амирга ташриф буюра олмайди. Хавфсизлик кучлари, оқсоқоллар ва полиция ўринбосари чора кўришлари керак. Туризм ҳаётий зарурат эмас”, — деди вазир.
Муҳаммад Ҳанафий ўз бўлими миллий паркка ташриф буюрувчилар учун қандай “қоидалар” ўрнатишини тушунтирмаган. Бомиён вилоятидаги дин арбоблари паркка келган аёлларни ҳижоб қоидаларига риоя қилмасликда айбламоқда. Уларга кўра, исломий кийиниш қоидаларини бузувчилар бошқа вилоятлардан ёки хориждан келмоқда.
Банди Амир Афғонистондаги биринчи миллий парк бўлиб, у 2009 йилда олтита фируза кўл табиий мажмуаси атрофида пайдо бўлган. Фуқаролар уруши бошланишидан олдин бу жой ғарблик сайёҳлар орасида машҳур бўлган.
Афғонистонда аёлларга нисбатан жорий қилинган тақиқлар
- Афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш тақиқланган.
Изоҳ (0)