Қирғизистон президенти Садир Жапаров Афғонистондаги вазият юзасидан TRT Аvaz нашрига интервью берди.
Сиёсатчи 2021 йилда Афғонистонда ҳокимият тепасига “Толибон” келгани ва мамлакатни улар бошқараётганини таъкидлади. Жапаров айрим давлатлар, жумладан, Қирғизистон “Толибон”ни тақиқланган ташкилотлар рўйхатидан чиқарганини эслатди. Эндиликда Россия ҳам шундай қарор қабул қилмоқчи.
“Толибон” ҳокимият тепасига келганидан кўп ўтмай, афғон халқига ёрдам бериш учун улар билан алоқа ўрнатдик. Бир неча бор гуманитар ёрдам жўнатдик. Афғонистондаги вазиятнинг янада кескинлашиши минтақага салбий таъсир кўрсатиши мумкин, шу учун мамлакат ҳукумати билан ҳамкорлик қилаётганимизни яширмаймиз, деди Қирғизистон президенти.
“Толибон” билан алоқа ўрнатиш
Сиёсатчи Афғонистонга кўрсатилаётган ёрдам етарли эмаслигига ҳам тўхталиб “Толибон” билан алоқа ўрнатишга чақирди.
“Толибон” заиф бўлганида, афғон халқи уларни аллақачон ағдариб ташлаган бўларди. Яхшими ёки ёмонми, улар ишлаяпти ва халқ уларни қўллаб-қувватламоқда. Ҳозирги кунда улар деярли тўлиқ яккаланиб қолган. Бу вазият қанча узоқ давом этса, афғон халқи шунча узоқ қийинчиликлар гирдобида қолади, деди Садир Жапаров.
Музлатилган активлар
“Толибон” ҳокимият тепасига келгач, Афғонистон Марказий банкининг хориждаги 9,4 миллиард долларлик активлари Ғарб давлатлари томонидан “музлатилган”.
Шундан қарийб 7 миллиард доллари АҚШга тўғри келади. Афғонистондаги вазиятни яхшилаш ва афғон халқининг фаровонлигини таъминлаш учун бу маблағларни имкон қадар тезроқ қайтариш зарур. Улар ҳукуматга нафақат инфратузилмани тиклашда, балки маҳаллий банклар орқали фуқароларга арзон кредитлар бериш, қишлоқ хўжалигини ривожлантириш ва аҳоли ҳаётини яхшилаш учун имкониятлар яратишда ёрдам бериши мумкин, дея таъкидлади у.
Садир Жапаров ҳозирда кўпчилик афғонларга очлик таҳдид солаётганини қайд этди.
Фурсатдан фойдаланиб, Европа мамлакатлари етакчилари ва АҚШ раҳбарларини Афғонистоннинг амалдаги ҳукуматини тан олишга ва афғон халқининг келажаги учун “музлатилган” маблағларни қайтаришга чақираман, деди у.
Қирғизистон президенти афғон талабаларини турли мутахассислик бўйича ўқитиш масаласига ҳам эътибор қаратди.
Агар Европа давлатлари ёки АҚШ турли лойиҳалар ёки махсус дастурлар орқали Афғонистонга ёрдам берса, уларни амалга оширишда иштирок этишга тайёрмиз. Агар техник ёрдам кўрсатиладиган бўлса, афғон талабаларини Қирғизистон олий ўқув юртлари базасида турли мутахассисликларга ўқитишга тайёрмиз. Агар таклифимизни қўллаб-қувватлайдиган мамлакатлар топилса, биз қисқа вақт ичида батафсил режа ишлаб чиқиб, уни амалга оширишни бошлашга тайёрмиз, дея хулоса қилди Жапаров.
Изоҳ (0)