Афғонистонда “Толибон” тақиқи сабаб университетда ўқишдан маҳрум бўлган 19 яшар қиз BBC’га ўз кечинмаларини айтиб берди.
“Пешонамиз шунчалик шўр бўлар экан, Аллоҳ аёлларни яратмагани яхши эди. Шунда умуман яшамасдик ҳам. Бизга ҳайвонлардан кўра ёмонроқ муносабатда бўлишади. Ҳайвонларку ўзи истаган жойга бориши мумкин, лекин биз қизларнинг остона ҳатлаб чиқишга ҳаққимиз йўқ”, — деди афғонистонлик қиз BBC мухбирига.
Афғонистонда “Толибон” ҳаракати университет ва ўрта мактабларни аёллар учун ёпган. Уларга нодавлат ташкилотларида ишлашга ҳам тақиқ қўйилган.
Евроиттифоқ “Толибон”нинг тақиқи инсониятга қарши жиноят эканини эълон қилди. Қатор давлатлар ҳам ўз норозилигини билдирди. “Толибон” аёлларнинг университетда таҳсил олишига қўйилган тақиқ сабаби сифатида талаба қизларнинг ҳижоб ўрамаганини айтган.
Декабрь ойида “Толибон” ҳаракати расмийси аёлларга университет ва ўрта мактаблар март ойидан бошлаб қайта очилишини маълум қилди.
Афғонистонда аёлларнинг шифохонага ёлғиз бориши мумкин эмас. Бундан ташқари, аёлларга SIM-карта сотиб олиш ҳам тақиқланган. Маълум жиноятлар учун аёлларни омма олдида қамчилаш бошланган.
Изоҳ (0)