Афғонистонда акушерлик ва ҳамшираликка ўқиётган аёлларга дарсларга келмаслик буюрилди. Шу тариқа улар таълимни тугатиш имкониятидан маҳрум бўлди. Бу ҳақда BBC хабар берди.
Журналистлар Афғонистондаги бешта ўқув муассасаси раҳбарияти билан суҳбатлашди. Улар “Толибон” вакиллари ўқув муассасаларини ёпишни ва кейинги кўрсатмаларни кутишни буюрганини айтди.
Расмий баёнот ҳали эълон қилмаган бўлса-да, тақиқни “Толибон” ҳаракатининг Соғлиқни сақлаш вазирлигидаги иккита манбаси ҳам тасдиқлади, деб ёзмоқда BBC.
Ижтимоий тармоқларда аллақачон талаба қизларнинг бу хабардан йиғлаётгани акс этган видео тарқалди.
Female students at a medical school in Afghanistan’s Kapisa province weep as a man announces that they are no longer allowed to continue their studies. The Taliban’s new order bans women from medical education, closing the last remaining institutions where women can learn. pic.twitter.com/C3SNsIC6OY
— Habib Khan (@HabibKhanT) December 3, 2024
“Толибон” 2021 йил августидан бошлаб қизларнинг ўрта ва олий таълим олишини тақиқлаган.
“Толибон” бир қатор масалалар, жумладан, ўқув дастури “исломий” бўлиши каби муаммоларни ҳал қилгач, қизларни яна мактабга қабул қилишларини бир неча бор ваъда қилган. Бироқ бу ҳозирга қадар амалга ошмади, дейди журналистлар.
Таълим олишни истаган аёллар учун очиқ қолган кам сонли йўллардан бири ҳамширалик ёки акушерлик курсларини ўқитадиган коллежлар эди. Тахминан 17 000 нафар аёл ана шундай курсларда таҳсил олган.
Жаҳон соғлиқни сақлаш ташкилоти маълумотларига кўра, Афғонистон дунёдаги оналар ўлими бўйича энг ёмон кўрсаткичлардан бирига эга. Хусусан, ҳар 100 мингта тирик туғилган чақалоққа 620 нафар аёлнинг ўлими тўғри келади.
Бирлашган Миллатлар Ташкилоти мамлакат эҳтиёжларини қондириш учун Афғонистон қўшимча 18 минг нафар акушерга муҳтожлигини таъкидлаганди.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш,
- аёлларнинг сотувчилари билан савдолашиш,
- аёлларга бир-бири билан гаплашиш тақиқланган.
Канада, Австралия, Германия ва Нидерландия аёллар дискриминацияси туфайли Халқаро судга “Толибон” устидан даъво аризаси билан мурожаат қилмоқчи.
Изоҳ (0)