Сирдарё вилояти аҳолиси орасида боқиманда кайфиятидагилар кўпчиликни ташкил қилмоқда. Бу ҳақда 22 август куни депутатлар билан ўтказилган йиғилишда вилоят ҳокими Эркинжон Турдимов айтиб ўтди.
Ҳоким сўзларига кўра, ҳудуд аҳолисини иш билан таъминлаш имконияти бошқа вилоятлардагига қараганда юқори. Бироқ одамлар мавжуд бўш иш ўринларидан бехабар қоляпти. Натижада қўшни вилоятлардан келган мутахассислар Сирдарёда ишламоқда.
“Маҳалла еттилиги эътиборсизлиги, фуқароларимиз боқимандалик кайфиятига берилаётгани эвазига ҳам ўзимизда иш туриб, одамларимиз ишламаяпти. Бошқа жойдан келган жуда кўп фуқаролар бизда меҳнат қилмоқда. Кенг жамоатчилик, маҳаллий еттилиги вилоятдаги мавжуд иш ўринларини жойларда етарлича тарғибот-ташвиқот ишларини олиб боришлари керак. Биз ўзимизни айбдор ҳисоблашимиз лозим”, деди ҳоким.
Эркинжон Турдимовнинг айтишича, вилоятда аксар маҳалла раислари ва мансабдорлар нима иш билан шуғулланишни билмайди. Улар орасида “куним ўца бўлди”, дейдиганлари ҳам бор.
“Барча даражадаги раҳбарлар маҳаллаларга бориб, одамларни ишга жалб қилишимиз керак. Ишламайдиган одамлар кўпайиб кетяпти, улар боқимандалик кайфиятига берилмоқда. Ишламайдиган одамга нафақа-пафақа бермаслигимиз лозим. Баъзиларга бориб, “ойлик уч миллион сўм”, десангиз, “бу пулга ишламайман”, дейди. Савиянгиз ўзи уч миллионлик, бошқа пул бера олмайди.
Агар кўпроқ пул оламан десангиз, мутахассис бўлишингиз, ўқишингиз керак. Ўқимасангиз, сизга ҳеч ким пул бермайди, хоҳласангиз шу. У ишлаши керак. Йўқ, уч миллионга ишламай, уйида ўтиришни афзал билади. Бунақа бўлмайди. “Дипломим бор”, дейди. Диплом бўйича оддий савол-жавоб қилсангиз ҳам билмайди. Бундай диплом кимга керак? У қоғоз, диплом эмас. Шунинг учун дипломи бор одам эмас, билими бор, қўлидан иш келадиган одам кўпроқ ойлик олади. Замон шундай бўлиб кетяпти”, деди ҳудуд раҳбари.
Эркинжон Турдимов аҳоли мурожаатлари кўпайгани, жойига бориб ўрганилса, аксар одамлар боқиманда кайфиятда бўлиб қолганини таъкидлади. Улар орасида “фақат бергин”, дейдиганлари кўп учраётганини урғулади. Ҳоким ўз нутқида камбағал билан боқиманданинг фарқи катталигини ҳам тушунтирган.
“Энг асосий мақсадимиз — одамларимизни ишлашга ўргатиш, боқимандаликдан чиқариш. Камбағал билан боқиманданинг фарқига боришимиз керак. Камбағалда боқувчиси бўлмайди, шароити оғирлиги сабаб ишлай олмайди. Ишлашга имконияти йўқ. Шу сабаб унга ёрдам қўлини чўзишимиз зарур.
Лекин қўлидан иш келадиган, уйида вояга етган фарзанди борларни қандай қилиб камбағал дейишимиз мумкин? У камбағал эмас, боқиманда. Уни боқимандаликдан чиқаришимиз керак. Ишласа, унга ҳақ беришимиз лозим. Ишламаса, унга ёрдам бермаслик керак. Боқимандага шароит, йўл-йўриқни кўрсатиб, ишлагин дейишимиз, иш беришимиз муҳим. Ишламаса, ана катта кўча”, деди вилоят раҳбари.
Аввалроқ Эркинжон Турдимов депутатлар обрўси баланд бўлиши кераклиги, улар сайловчилар масалаларини ҳар қандай даражадаги раҳбарга кўндаланг қўйиши зарурлигини айтганди. Ҳоким ўз чиқишларидан бирида ободонлаштириш бригадаси бошлиғи қўл остида ишлайдиган аёл номига кредит олиб ҳажга борганини танқид қилган.
Изоҳ (0)