Америка Қўшма Штатлари Федерал қидирув бюроси (ФҚБ) Дональд Трампнинг миллий хавфсизлик бўйича собиқ маслаҳатчиси Жон Болтоннинг уйида тинтув ўтказган. Бу ҳақда The New York Post нашри хабар берди.
Манбага кўра, Болтоннинг уйида тинтув ФҚБ директори Кеш Пател томонидан бошланган тергов доирасида ўтказилган. Пател ўзининг Х (Twitter)даги постида шундай ёзди: “Ҳеч ким қонундан устун эмас. ФҚБ агентлари топшириқни бажармоқда”.

Fox News ва CNN каналлари ҳам собиқ амалдорнинг уйида тинтув ўтказилганини тасдиқлади. Болтон 2020 йилда “The Room Where It Happened: A White House Memoir” (“Бу содир бўлган хона: Оқ уй хотиралари”) номли мемуарини чоп этган. Сиёсатчининг китобида бир қатор махфий маълумотлар ошкор қилингани сабабли унга нисбатан тергов бошланган.
Президент Дональд Трамп китобнинг чоп этилишига қаттиқ қаршилик қилган. Трампнинг айтишича, агар китоб чоп этилса, Болтон ўзи имзолаган махфийлик келишувини бузган бўларди. Бироқ АҚШ етакчиси китобнинг чоп этилишига тўсқинлик қила олмади. Болтонга қарши тергов бир неча йил аввал бошланган бўлса-да, Президент Жо Байден уни сиёсий сабабларга кўра тўхтатиб қўйган эди.
Дональд Трампнинг биринчи президентлик даврида Жон Болтон 2018 йил апрелида миллий хавфсизлик бўйича маслаҳатчи лавозимини эгаллаган. Трамп уни 2019 йил сентябрида лавозимидан озод қилган. Президент бунга сабаб сифатида Болтоннинг айрим таклифларига қатъиян қўшилмаслигини кўрсатган. Маслаҳатчи Россия, Эрон ва Шимолий Кореяга нисбатан қаттиқ сиёсат олиб бориш тарафдори бўлган.
Жон Болтон Дональд Трампнинг иккинчи президентлик муддати бошлангач, унинг Украина бўйича позициясини ва Россияга музокарачи сифатида Стив Виткоффнинг юборилишини кескин танқид қилиб келмоқда. У Трамп ва Владимир Путиннинг Аляскадаги учрашувидан сўнг шундай деган: “Трамп ютқазмади, бироқ Путин аниқ ютди”. Трамп эса Болтоннинг бундай гаплари оммавий ахборот воситаларида тарқалаётганидан норози бўлган.
Изоҳ (0)