АҚШнинг сайланган президенти Дональд Трампнинг жамоаси Афғонистондан қўшинларни олиб чиқишда иштирок этган амалдаги ва собиқ юқори мартабали ҳарбийлар рўйхатини тузмоқда, уларни жавобгарликка тортиш имкониятини ўрганмоқда. Бу ҳақда манбаларга таяниб, NBC Nеws хабар берди.
Манбалардан бири Америка қўшинларининг 2021 йил Афғонистондан олиб чиқилиши, хусусан, ушбу қарорда иштирок этганлар ҳақида маълумот тўплаш учун комиссия тузиш режалари борлигини айтди. Ушбу ҳарбий хизматчиларга давлатга хиёнат қилиш айблови қўйилиши ва улар ҳарбий трибуналга тортилиши мумкин. Трамп жамоаси бунинг эҳтимолини ўрганмоқчи.
“Улар (Трамп жамоаси) бу масалага жуда жиддий ёндашмоқда”, деб таъкидлади NBC телеканали суҳбатдошларидан бири.
Манбаларнинг қўшимча қилишича, ушбу йўналишнинг кураторлари орасида Мудофаа вазирининг гиёҳванд моддалар ва глобал таҳдидларга қарши курашиш бўйича ёрдамчисининг собиқ ўринбосари Мэтт Флинн ҳам бор. Масаланинг ҳуқуқий жиҳати, яъни давлатга хиёнат қилиш айблови ноаниқ бўлиб қолмоқда, чунки Америка ҳарбийлари АҚШнинг амалдаги президенти Жо Байденнинг буйруғини бажарган.
АҚШ қўшинларнинг Афғонистондан чиқиши
АҚШ 2001 йилдаги 11 сентябрь терактларидан сўнг Афғонистонга ўз қўшинларини киритди. Уларнинг мақсади ушбу ҳужумлар учун жавобгар бўлган “Ал-Қоида” гуруҳига қарши курашиш эди. Миссияни тугатиш тўғрисидаги биринчи келишувни 2020 йилда Трамп имзолаган. Қўшинларнинг олиб чиқилиши бир йил ўтгач, Байден даврида амалга оширилди. Америкаликлар чиқиб кетгандан сўнг, Афғонистонда ҳокимиятни “Толибон” ҳаракати эгаллади.
Байден “Толибон” ҳокимиятини тан олишдан бош тортди. АҚШ ва унинг иттифоқчилари Афғонистон муваққат ҳукуматидан инсон ҳуқуқларига риоя этиш ва минтақада террорчи гуруҳларнинг тарқалиши билан боғлиқ муаммоларни ҳал этишни талаб қилмоқда. Сўнгги йилларда “Толибон” аёллар учун чекловларни сезиларли даражада кучайтирди.
Жорий йил 5 ноябрь куни бўлиб ўтган АҚШ президентлиги сайловида Трамп ғалаба қозонди. У Америка қўшинларининг Афғонистондан олиб чиқилишини “тарихдаги энг шармандали воқеа” деб баҳолади. Республикачи номзод Оқ уйга қайтган тақдирда, “Афғонистондаги фалокатга алоқадор бўлган ҳар бир юқори мартабали ҳарбий амалдорни” ишдан олишга ваъда берди. “Толибон” эса, ўз навбатида, унинг ғалабасини АҚШ билан муносабатларни “тоза варақдан” бошлаш имконияти билан боғлади.
Изоҳ (0)