Анор қадимданоқ Шарқда барча меваларнинг шоҳи ҳисобланган. У Афғонистоннинг кўплаб вилоятларида, жумладан, Қандаҳор, Ҳилманд, Пактика, Каписа ва Кобулда етиштирилади. Ҳосилнинг кўплиги туфайли мева нархи кескин арзонлашган. Бу бир тарафдан харидорларни хурсанд қилса-да, бошқа томондан савдогарлар норозилигига сабаб бўлмоқда. “Дарё”нинг Афғонистондаги мухбири сотувчилар билан суҳбатлашиб, анорнинг арзонлиги сабабларини ўрганди.
Мозори Шарифдаги анор сотувчиларнинг айтишича, бу йил мева мисли кўрилмаган даражада арзонлашган. Афғонистон бозорида энг яхши анорнинг бир килоси 40 афғонига (салкам 7,500 сўм) сотилмоқда, бундай анорлар асосан Қандаҳорда етиштирилади.
Мева нархининг арзонлашиши сабаби
2024 йил Афғонистонда ўтган йилларга нисбатан анор ҳосили яхши бўлди. Мева қўшни давлатларга экспорт қилинаётгани деҳқонлар учун етарли эмас. Улар ўз маҳсулотларини бозорга ҳам олиб чиқиб сотмоқда. Бу эса анор нархининг арзонлашишига сабаб бўлмоқда.
Мозори Шариф бозорида бир килограмм анорнинг нархи 20 афғонидан (3 минг 700 сўмдан ортиқ) бошланади. Октябрь ойида “Толибон” Саноат ва савдо вазирлиги Қозоғистонга 32 тонна Қандаҳор анори экспорт қилинишини маълум қилди. Покистоннинг афғон мевасига божхона тарифини ошириши анор экспортини қийинлаштирмоқда.
Қандаҳорлик деҳқонлар иссиқ ҳаво туфайли анор маҳсулотларининг бир қисми сифати бузилганини айтган. Улар 4 килограм анорни 30 афғонидан (5600 сўм) сотган ҳолатлар бўлган.
Ҳозирга қадар Қандаҳорда қиймати 13 миллион доллардан ортиқ 22 минг 500 тонна анор экспорт қилинган. Бозорларда бир стакан анор шарбати эса 50 афғонига (9300 сўм) сотилади. Қандаҳар ва Тағоб анори жуда ширин, нархи ҳам нисбатан қиммат.
Изоҳ (0)