“Толибон” аёлларга эркакларга қарашни, жамоат жойларида ва уйда баланд овозда гапиришни тақиқлади. Бу ҳақда “Толибон”нинг 114 бетлик янги кўрсатмалари билан танишиб чиққан The Telegraph нашри хабар берди.
![](/static/2024/08/23/photo_2024-08-23_15-43-21-kIAyZu2m.jpg)
Кўрсатмалар Афғонистон фуқаролари учун кундалик ҳаётни тартибга солувчи қатъий чоралардан иборат. Янги қоидаларга кўра, аёллар бегона эркакларга қарамаслиги ва уларга гапиришдан тийилиши лозим. Шунингдек, улар “ўзгаларни васвасага солмаслиги ва бунга йўл қўймаслик учун” юзларини беркитиши керак.
Афғон аёлларига овозлари ташқарига эшитилмаслиги учун уй ичида баланд овозда гаплашиш ҳам ман этилган.
Халқаро ҳамжамиятнинг “Толибон” билан мулоқоти уларга аёлларни янада кўпроқ эзишга дадиллик берди. Ҳокимият тепасида турган бу радикал шахслар бизнинг мавжудлигимизни тан олишдан бош тортмоқдалар, дейди Кобулдаги собиқ давлат хизматчиси Зайнаб.
Асосан аёлларнинг хулқ-атворига қаратилган янги қоидалар жамоат жойларида аёллар танасини доим тўлиқ ёпиб юришни мажбурий қилиб қўяди. Янги қоидалар “Толибон”нинг олий раҳбари томонидан тасдиқланган.
Агар аёллар уйларини тарк этишлари керак бўлса, улар юзларини ва овозларини эркаклардан яшириши керак, дейилади қоидада.
Бундан ташқари, аёлларнинг жамоат жойларида қўшиқ айтиши ва Қуръон ўқиши тақиқланган, кийимлари тор ёки калта бўлмаслиги лозим.
Такси ҳайдовчиларига “ҳижобсиз ёки эркак васийси бўлмаган аёлларни” ташимаслик бўйича кўрсатма берилган. Янги қоидаларга қарши чиққан аёллар ҳибсга олинади ва қамоққа ташланади, дейилади “Толибон” хабарида.
Эркакларга нисбатан тақиқ
Эркакларга ҳам жамоат жойларида аёлларнинг юзига қараш тақиқланади. Бундан ташқари, уларга соқолларини қисқартириш ва олиш ҳам ман этилган.
Янги қоидалар аллақачон кўплаб эркинликлардан маҳрум этилган афғон аёллари орасида қаттиқ норозилик уйғотди. “Толибон” ҳокимиятга қайтганидан бери 12 ёшдан ошган қизлар ҳам таълим олиш имкониятидан маҳрум этилган.
“Улар аслида биз учун Афғонистон деб номланган улкан қафас яратдилар. Олдинда нималар кутаётганидан жуда хавотирдаман. Улар ҳижобсиз аёлларни жиноий жавобгарликка тортиш билан таҳдид қилишди, аммо ҳижобнинг қайси турини мақбул деб ҳисоблашларини аниқлаштирмади. Аёлларни кўчада ҳибсга олишади ва эркак ҳамроҳлари бўлмаса, таксилардан туширишади”, дейди Зайнаб.
Изоҳ (1)
Rasmni zor tanlabsizlare