Афғон ҳарбий кучлари аввалроқ Покистон томонидан амалга оширилган ва 46 нафар афғон ҳалок бўлган ҳаво зарбасига жавобан Покистоннинг бир қатор ҳудудларига ҳужум қилди.
Аниқланишича, икки мамлакат чегарасидаги жанглар 27 декабрь оқшомидан бери давом этмоқда.
Афғонистон Мудофаа вазирлигига кўра, афғон ҳарбийлари Покистоннинг мамлакат ҳудудига ҳаво ҳужумларига жавобан “душман кучлари ва уларнинг тарафдорлари жойлашган марказлар ва бошпаналарга” ҳужум қилган.
Икки давлат орасидаги 2600 километрдан ортиқ узунликдаги чегара 1893 йилги Дюранд чизиғи асосида белгиланган бўлиб, у Афғонистон Амирлиги ва Британия Ҳиндистони ўртасидаги чегараларни белгилаш келишуви натижасида вужудга келган. Афғонистон ҳукумати 1947 йилда Британия Ҳиндистони парчаланиб, Покистон ташкил топганидан сўнг бу чегарани тан олишни тўхтатди. 2021 йилдан буён Афғонистонни назорат қилаётган “Толибон” ҳам бу позицияни қўллаб-қувватламоқда.
Эроннинг Tasnim агентлиги ҳам 27 декабрь куни кечқурун Афғонистоннинг Хост ва Пактия провинциялари чегара ҳудудларида “Толибон” тарафдорлари ва Покистон ҳарбийлари ўртасида жанглар кетаётганини ёзган.
Покистон 24 декабрь куни Афғонистоннинг Пактика вилояти Бармал туманига ҳаво ҳужуми уюштирган эди.
Вайроналар остидан 15 киши, жумладан, аёллар ва болалар жасади олиб чиқилган. Манбаларга кўра, Бармал туманидаги камида етти қишлоқ ҳаво ҳужумига учраган. Ламан қишлоғида бир оиланинг беш аъзоси, жумладан аёллар ва болалар ҳалок бўлган. Қурбонлар сони ортиши мумкин ва одамлар вайроналар остидан жасадларни олиб чиқмоқда.
Маҳаллий аҳоли портлаш Покистон самолётлари томонидан амалга оширилганини айтган. Авиатехникалар Хост, Пактия ва Пактика осмонида патруллик қилмоқда.
“Толибон” жавоб қайтаришга ваъда берди
“Толибон” Мудофаа вазирлиги Покистоннинг Бармал туманининг бир қисмига уюштирган ҳаво ҳужумларини очиқ тажовуз сифатида қоралади. Вазирлик ҳужумлар Покистон армияси томонидан амалга оширилганини таъкидлади.
“Толибон” бу шафқатсиз ҳаракатни барча халқаро тамойилларга зид ва очиқ тажовуз деб ҳисоблайди ва уни кескин қоралайди, дейди вазирликнинг расмий вакили Иноятулла Хоразмий.
У ҳужумда асосан “вазиристонлик қочқинлар”ни нишонга олингани, бир қанча болалар ва бошқа тинч аҳоли вакиллари ҳалок бўлган ва яраланганини айтди. “Толибон” ҳужумни жавобсиз қолдирмасликларини қўшимча қилди.
Al Jazeeraъниг таъкидлашича, “Толибон” Афғонистонда ҳокимият тепасига келгач, “Таҳрики Толибон Покистон” (ТТП) жангарилари Покистон хавфсизлик кучларига чегарада, айниқса, Хайбар-Пахтунхва ва Балужистонда ҳужум қилиш ҳолатлари кўпайган.
Афғон толиблари ва ТТП ўртасидаги “симбиотик муносабатлар” йиллар давомида давом этиб келган. Шу сабабли, Кобулнинг Исломобод талабига кўра ТТП аъзоларига қарши бирон-бир чора кўриши эҳтимолдан узоқ. Бундай ҳаракат минтақада “Афғонистондаги Ислом давлати” каби бошқа, янада радикал гуруҳларнинг фаоллашувига олиб келиши мумкин.
Изоҳ (0)