Европа Иттифоқи (ЕИ) «Толибон»нинг аёллар эркинлигига қўйган янги чекловларини, жумладан, уларнинг истироҳат боғлари ва спорт клубларига киришини тақиқлаганини қоралади. Бу ҳақда Aamaj news хабар берди.
ЕИ эълон қилган баёнотида «Толибон» ҳаракатини ўз мажбуриятларини бузганликда айблади, уларнинг янги чекловлари «афғон аёллари ва қизлари ҳуқуқларини қаттиқ поймол қилишдан ташқари, уларнинг ваъдаларига зид» эканини билдирди. «Толибон»дан Афғонистоннинг халқаро ҳуқуқ, хусусан, инсон ҳуқуқлари, қочқинлар ҳуқуқлари ва гуманитар қонунлар доирасидаги мажбуриятларини ҳурмат қилиш сўралди.
Шунингдек, баёнотда «Толибон»нинг 2021 йилги қоидалари афғон аёлларининг «ижтимоий ва иқтисодий ҳаётнинг деярли барча соҳаларидан маҳрум бўлишига» сабаб бўлгани қайд этилди.
Эслатиб ўтамиз, ноябрь ойида «Толибон» ҳукумати аёлларнинг истироҳат боғи ва спорт залларига ташриф буюришини тақиқлаб қўйди. Бу тақиқ афғон аёллари учун анчадан буён амал қилиб келаётган бошқа бир қатор чекловлар қаторига қўшилди.
«Толибон» ҳукумати аёлларнинг ишлаш ва ўқиш ҳуқуқларини чеклаб қўйган. Қизларнинг мактабларга боришига ва аёлларнинг ишлашига рухсат берилмайди. Шу билан биргаликда, қонунларга кўра, аёллар кўчада юзларини тўлиқ ёпишлари керак ва эркаксиз уйдан чиқишга ҳақли эмаслар. Ҳозирча дунёнинг ҳеч бир давлати «Толибон» ҳукуматини тан олмаган.
Халқаро ҳамжамиятнинг «Толибон»ни тан олиш шарти мамлакатда инклюзив ҳукуматни шакллантириш, шунингдек, аёллар ва қизларнинг асосий ҳуқуқ ва эркинликларини таъминлашдан иборат бўлади.
Мавзуга доир:
- «Толибон» етакчиси жиноятчиларни «шариат қонунлари» асосида жазолашни буюрди
- Афғонистонда «Толибон» ҳаракатини Facebook’да танқид қилган йигит қамоққа олинди
- «Толибон» Кобул аҳолисини уйларига видеокузатув камералари ўрнатишга чақирди
- Афғонистонда «Толибон» вакили унга турмушга чиқишдан бош тортган ўсмир қизни ўлдирди
Изоҳ (0)