“Толибон” ҳаракати расмийси аёлларга университет ва ўрта мактаблар март ойидан бошлаб қайта очилишини маълум қилди. Бу ҳақда Sputnik хабар берди.
Маълум қилинишича, 2023 йил март ойида қизларнинг таълим олишига оид қарор қабул қилинади. “Толибон” муваққат ҳукуматининг кон ва нефть саноати бўйича вазири Шаҳобиддин Делавар бу ҳақда гапирган.
“Ҳамал ойигача, шариат ва афғон анъаналарига мос келадиган ўрта мактаб, бошланғич мактаб ва университетлар бўйича қарор қабул қилинади”, — деган Делавар
Афғонистонда “Толибон” ҳаракати университет ва ўрта мактабларни аёллар учун ёпган. Уларга нодавлат ташкилотларида ишлашга ҳам тақиқ қўйилган. Аёлларга таълим олиш ва ишлаш ҳуқуқини тақиқлаган бўлса-да, Афғонистон бош вазири ўринбосари Абдул Ғани Бародар фуқаролардан ўз ҳуқуқларига эга чиқишни талаб қилган.
Мулла Бародарнинг баёноти билан боғлиқ қўшимча тушунтиришлар берилмаган бўлса-да, сўнгги кунларда “Толибон” аёлларнинг таълим олиш, ишлаш ҳуқуқини тўхтатгани танқидларга сабаб бўлмоқда. Айрим афғон манбалари бу қарорга “Толибон”нинг аксар расмийлари ҳам қаршилигини билдирган.
Айни пайтда “Толибон” етакчиси мулла Ҳайбатулла Охундзода аёлларнинг таълим олишига қўйилган тақиқнинг бекор қилиниши юзасидан “Ҳаққоний тармоғи” гуруҳи асосчисининг ўғли Сирожиддин Ҳаққоний ва “Толибон” асосчиларидан бирининг ўғли Мулла Ёқуб билан учрашишдан бош тортган.
Евроиттифоқ “Толибон”нинг тақиқи инсониятга қарши жиноят эканини эълон қилган. Қатор давлатлар бундан норозилик билдирган. “Толибон” аёлларнинг университетда таҳсил олишига қўйилган тақиқ сабаби талаба қизларнинг ҳижоб ўрамагани эканини айтган.
Афғонистонда аёлларнинг шифохонага ёлғиз бориши мумкин эмас. Бундан ташқари, аёлларга SIM-карта сотиб олиш ҳам тақиқланган. Маълум жиноятлар учун аёлларни омма олдида қамчилаш бошланган.
Изоҳ (0)