Бирлашган Миллатлар Ташкилотининг (БМТ) тараққиёт дастури раҳбари Ачим Штайнер ташкилот Афғонистондан чиқиб кетиши мумкинлигини айтди. Бу ҳақда “Дарё”нинг Афғонистондаги мухбири хабар берди.
Штайнернинг айтишича, агар “Толибон” аёлларнинг БМТ билан ишлашига қўйилган тақиқни бекор қилмаса, UNAMA Афғонистонни тарк этади. Ташкилот расмийси “Толибон” аёлларга айрим соҳаларда ишлашга рухсат берган бўлса-да, Афғонистонга кўпроқ аёл ишчилар кераклигини таъкидлади.
“Толибон” Афғонистонда аёлларнинг фаолиятига чекловлар қўйишдан ташқари, шу ойда аёлларга БМТ бўлимларида ишлашни ҳам тақиқлаган.
“Толибон”: Афғонистонда БМТ фаолиятига ҳеч қандай тўсиқ йўқ
“Толибон” ҳаракати БМТнинг Афғонистондаги маҳаллий аёл ходималарига ишлашни тақиқлаган. БМТ бош котибининг матбуот котиби Стефан Дюжаррик тақиқни “номақбул ва тушунарсиз” деб атаган ва бу гуманитар ташкилотларнинг кўмакка муҳтож одамларга ёрдам беришга путур етказиши мумкинлигини таъкидлаган.
“Афғон аёлларининг БМТда ишлашини тақиқлаш қарори ички масала бўлиб, буни барча томонлар ҳурмат қилиши керак. Бу қарор Афғонистонда дискриминация борлигини ёки БМТ фаолияти блокланганини англатмайди. Аксинча, барча юртдошларимизнинг диний ва маданий манфаатларини инобатга олган ҳолда барча ҳуқуқларини ҳимоя қилиш тарафдоримиз”, — деган “Толибон” матбуот котиби Забиҳуллоҳ Мужоҳид.
2022 йил декабрь ойида “Толибон” аёлларга нодавлат ташкилотларда ишлашни тақиқлаганди. Оммавий халқаро норозиликлардан сўнг, ҳеч бўлмаганда соғлиқни сақлаш соҳасида тақиқ енгиллаштирилди. Шу билан бирга, тақиқ БМТ идораларига тааллуқли эмас эди.
2021 йил августида ҳокимиятга келганидан бери “Толибон” Афғонистонда аёлларга нисбатан бир қатор дискриминация чекловларини қўйган. Бундан ташқари, мусиқа, ижтимоий тармоқлар ва видео ўйинлар қонундан ташқари деб топилган.
Изоҳ (0)