Афғонистоннинг амалдаги ҳукумати олтинчи ва ундан пастки синфларда ўқийдиган қизларга мактабда таълимни давом эттириш учун рухсат берди. Бу ҳақда Tolo News мамлакат Таълим вазирлиги хатига таяниб хабар берди.
Мактубда айтилишича, «пастки синфларда ўқувчи қизлар мактаб ва курсларда таҳсил олишни давом эттириши мумкин».
Шунингдек, бошланғич мактабларда ишлаган ва декабрь охирида ишдан четлатилган ўқитувчи аёлларнинг ҳам ишлашига рухсат берилади. Қизлар учун ўқишни давом эттириш шартларидан бири «ўқувчи ва ўқитувчиларнинг шариат қоидаларига мувофиқ мажбурий ҳижоб ўраши» ҳисобланади.
«Толибон» аъзоларининг ўзлари ушбу ҳужжат мазмунини изоҳлаганича йўқ.
Шу билан бирга, Афғонистонда олий таълим вазири вазифасини бажарувчи Неда Муҳаммад Надим БМТнинг Афғонистон бўйича махсус вакили Маркус Поцел билан учрашувда Ислом Амирлиги аёлларнинг таълим олишини тўлиқ тақиқлаш ҳақида қарор қабул қилмагани, аммо ташқи омиллар туфайли бу масалани кейинга сурганини айтган.
Надим улар босим ўтказилиши туфайли кимнингдир талабини қабул қилмаслигини қўшиб қўйди.
«Вазир айтдики, биз шариат доирасида бутун афғон халқи ҳуқуқларига риоя қилиниши тарафдоримиз ва таълим соҳасида бутун дунё билан яхши алоқада бўлишни хоҳлаймиз. Биз халқаро ҳамжамиятдан бизга шариатга зид сўровлар билан мурожаат қилмасликларини сўраймиз», — деди вазирлик вакили Зиёулло Ҳошимий.
Аввалроқ «Толибон» ҳаракати расмийси аёлларга университет ва ўрта мактаблар март ойидан бошлаб қайта очилишини маълум қилган эди.
Афғонистонда «Толибон» ҳаракати университет ва ўрта мактабларни аёллар учун ёпган. Уларга нодавлат ташкилотларида ишлашга ҳам тақиқ қўйилган. Аёлларга таълим олиш ва ишлаш ҳуқуқини тақиқлаган бўлса-да, Афғонистон бош вазири ўринбосари Абдул Ғани Бародар фуқаролардан ўз ҳуқуқларига эга чиқишни талаб қилган.
Евроиттифоқ «Толибон»нинг тақиқи инсониятга қарши жиноят эканини эълон қилган. Қатор давлатлар бундан норозилик билдирган. «Толибон» аёлларнинг университетда таҳсил олишига қўйилган тақиқ сабаби талаба қизларнинг ҳижоб ўрамагани эканини айтган.
Афғонистонда аёлларнинг шифохонага ёлғиз бориши мумкин эмас. Бундан ташқари, аёлларга SIM-карта сотиб олиш ҳам тақиқланган. Маълум жиноятлар учун аёлларни омма олдида қамчилаш бошланган.
Изоҳ (0)