Россия ҳарбий разведкаси узоқ йиллар давомида Афғонистондаги террорчи гуруҳларга 2021 йил ўрталарига қадар Афғонистонда бўлган халқаро коалиция ҳарбийларини ўлдиргани учун пул тўлаган. Бу ҳақда Insider ва Der Spiegel эълон қилган суриштирувда айтилади.
Собиқ афғон давлат хизматчилари, жумладан, Миллий хавфсизлик бошқармаси (BMB) журналистларга АҚШ ва коалиция аскарларига нисбатан ҳужумлар 2016 йилдан 2019 йилгача содир бўлганини айтди.
Ҳар бир ҳалок бўлган ҳарбий учун мукофот 200 минг долларни ташкил этган, “Толибон”га жами камида 30 миллион доллар тўланган, дейилади хабарда.
Таъкидланишича, пулларни қундузлик собиқ контрабандачи Раҳматулла Азизий бошқарувидаги курьерлар ташиган. Журналистлар Азизий 2019 йилдан бери Москвада истиқомат қилаётгани ва унинг Раҳим Аҳмадов номига берилган Россия фуқароси паспорти борлигини айтди.
Бу ҳужжатнинг рақами Солсберида собиқ икки томонлама агент Сергей Скрипал ва унинг қизи Юлияни “Новичок” асаб-фалажловчи модда билан заҳарлаган Анатолий Чепига (Руслан Боширов)нинг паспорт рақамидан фақат икки рақам билан фарқ қилади, дейди журналистлар.
Афғон курьерлари Россияда бошпана топди
“Толибон” жангчиларига ва бошқа гуруҳларга пул ўтказиш учун Россия махсус хизматлари қимматбаҳо тошлар билан савдо қилувчи фирма ниқоби остида афғон курьерлари тармоғини сақлаб турган.
Ўз вазифаларини бажарганидан сўнг, курерлар Россия ҳужжатларини ва Россияда бошпана олишган, деб хабар бермоқда Insider.
Нашр маълумотларига кўра, афғон жангчиларининг россиялик кураторлари “Скрипалга нисбатан заҳарланиш ва Европадаги қўпорувчилик билан танилган” 29155-ҳарбий қисм зобитлари бўлган.
Терговчилар террорчилик ҳужумларини молиялаштириш дастурининг раҳбари сифатида 29155-қисм қўмондони ўринбосари генерал-лейтенант Иван Касяненкони, “Толибон” билан Россия разведкасининг асосий алоқачиси сифатида эса Алексей Титов номидаги паспорт билан парвоз қилувчи полковник Алексей Архиповни кўрсатмоқда.
Суриштирувда айтилишича, курерлар тармоғидаги баъзи афғонлар Европа иттифоқига қочоқлар ниқоби остида кириб қолган. Der Spiegel маълумотларига кўра, уларнинг камида иккитаси Германияда бошпана сўраб мурожаат қилган, рад этилган, аммо улар мамлакатда яшашда давом этмоқда.
Insider нашрининг аниқлаган маълумотлари шуни кўрсатадики, Россиянинг турли исёнчи гуруҳларни марказий ҳукумат ва Америка ваколатхонасига қарши қайраб қўйиш дастури “Толибон”нинг мукофотлаш дастурига қараганда анча кенг кўламли бўлган ва узоқроқ вақт давом этган.
Изоҳ (0)