«Толибон» ҳаракати тез орада қизларнинг таълим олишига қўйилган тақиқ масаласини қайта кўриб чиқади. Бу ҳақда АҚШнинг Афғонистондаги махсус вакили Томас Уэстга таяниб, Reuters хабар берди.
АҚШ вакили бу ҳақда Доҳадаги форумда маълум қилган. Унинг фикрича, мазкур қарор нафақат афғон аёл-қизларининг таълим олиш борасидаги ҳуқуқларини бузади, балки бутун Афғонистон келажагини хавф остига қўяди.
«Ўтган чоршанба куни содир бўлган ўзгаришлардан ҳайратга тушдим. Бу аввало афғон халқининг ишончига путур етказишдир. Ўйлайманки, барчаси йўқотилмаган. Тез кунларда ушбу қарор бекор қилинишини кўрамиз, деган умиддаман», — дейди у.
Агентлик маълумотларига кўра, Қўшма Штатлар Доҳада толиблар билан асосий иқтисодий масалалар муҳокама қилиниши керак бўлган учрашувни қўққисдан бекор қилган. Таъкидланишича, бу каби қарор толиблар барча қизларни ўрта мактабларга қайтариш тўғрисидаги қарорни бекор қилганидан сўнг қабул қилинган.
Бундан олдин «Толибон» вакиллари аёлларнинг эркак ҳамроҳсиз самолётда учишини тақиқлаган эди — улар авиакомпанияларга янги қоидалар тўғрисидаги хатни юборган. Гап нафақат Афғонистон ичидаги, балки хорижий рейслар ҳақида ҳам кетмоқда. Манбаларга кўра, толиблар буйруғига мувофиқ 25 март куни Кобул аэропортида ўнлаб аёлларнинг қўнишига рухсат берилмаган. Шу билан бирга, аёлларнинг бир қисмига Ariana Airlines самолётига ўтиришга рухсат берилган, бироқ қарор эълон қилинган вақтда портнинг жўнаш вақти яқинлашиб қолган эди.
«Толибон» мамлакатда яна ҳокимият тепасига келган август ойида аёлларга «ислом қонунлари доирасида» ишлаш, ўқиш ва жамият бошқарувида иштирок этишга рухсат берилиши айтган эди. Шу билан бирга, толибларнинг шартларига кўра, Афғонистонда аёлларнинг барчаси ҳижоб (паранжи) кийиши керак бўлади. «Толибон» аввалги бошқаруви давридан фарқли равишда бу сафар аёлларнинг уйдан ёлғиз, эркаклар ҳамроҳлигисиз чиқа олиши мумкинлигини кафолатламоқда.
Кейинчалик Мужоҳид Афғонистондаги ишлайдиган аёлларни ўз хавфсизлиги учун уйдан чиқмасликка чақирганди. «Бизнинг хавфсизлик кучларимизга аёллар билан қандай муносабатда бўлиш, улар билан қандай мулоқот қилиш ҳақида ўргатилмаган. Мамлакатда тўлиқ хавфсизлик ўрнатилмагунча аёллардан уйда қолишини сўраймиз », — деган эди ҳаракат вакили.
Февраль охирида Афғонистондаги барча давлат университетлари йигит-қизлар учун қайта очилганди. Қайта очилган Кобул давлат университети талабаларининг айтишича, «Толибон» талабига кўра қизлар ва йигитларга алоҳида-алоҳида дарс ўтилмоқда. Куннинг бир қисмида фақат қизлар, бошқа қисмида — ўғил болалар учун дарслар белгиланган.
Изоҳ (0)