Афғонистон ҳудудида ТAPI магистрал газ қувури қурилиши бошланди. Бу ҳақда “Толибон” расмий вакили Забиҳуллоҳ Мужоҳид Ariana News нашрига маълум қилди.
Мужоҳиднинг сўзларига кўра, лойиҳани амалга ошириш учун зарур бўлган техник жиҳозлар Афғонистон ва Туркманистон ўртасидаги чегара зонасига етказилган, амалий ишлар бошланган.
Ушбу лойиҳанинг турли бўлимлари устида кўп сонли мутахассислар ишламоқда ва унинг биринчи босқичи келгуси икки йил ичида якунланади, дея маълум қилди Мужоҳид.
Таъкидланишича, тез орада CASА-1000 – Марказий Осиё —Жанубий Осиё минтақавий электр узатиш линияси лойиҳасини амалга ошириш бўйича амалий ишлар бошланади.
Афғонистон аста-секин мустаҳкамланиб, мамлакат фуқароларига яхши иш ўринларини тақдим этади, деди Мужоҳид.
Мутахассислар ТAPI мамлакат иқтисодиётини ривожлантиришда муҳим рол ўйнайди, деб ҳисоблайди. Хусусан, у қуриб битказилгач, 12 минг киши иш билан таъминланади, Афғонистоннинг йиллик даромади эса 1 миллиард долларга ошади.
ТAPI
Туркманистон — Афғонистон — Покистон — Ҳиндистон газ қувурини қуриш лойиҳаси ҳисобланади. Унинг узунлиги 1840 километрни ташкил этади. Йилига 33 миллиард куб метр табиий газ ўтказиш қувватига эга ТAPI газ қувурининг қурилиши 2015 йилда бошланган.
Лойиҳага кўра, Туркманистон газини Афғонистон орқали Покистон ва Ҳиндистон бозорларига етказиб берилади. Туркманистон ҳудудида 214 километр узунликдаги участканинг қурилиши аллақачон якунланган. Навбат — Афғонистон орқали қувурлар ўтказишда. Лойиҳанинг умумий қиймати 10 миллиард долларга баҳоланмоқда.
“Толибон” газ транзитидан йилига 450 миллион доллар даромад олишни мўлжаллаяпти. Бундай прогнозни Афғонистон ташқи ишлар вазири вазифасини бажарувчи Амир Хон Муттақий эълон қилган. У Афғонистон ўз ҳудуди орқали ресурсларни ташиш учун тўланадиган фойда билан бир қаторда йилига 5 миллиард куб метр газ ҳам олишини айтган.
Изоҳ (0)