“Толибон” ҳаракати етакчиси мулла Ҳайбатулла Охундзода Афғонистон муваққат ҳукуматини танқид қилиб, уларни “савдогарлар” деб атади. Бу ҳақда Hasht-e Subh Daily хабар берди.
Охундзоданинг ижтимоий тармоқларда тарқалган аудиоёзувида “Толибон” ҳукумати танқид остига олиниб, “бу ҳукумат эмас, транзакция” экани таъкидланган. “Толибон” раҳбари ҳукуматнинг бундай савдолашуви мусулмонлар учун эмас, балки бир қанча одамлар манфаатини кўзлаб, амалга оширилаётганини айтган. У “ҳукумат” ичида хавфсизлик бўлиши зарурлигини айтиб, “устунликка интилиш ишончсизликка олиб келишини” билдирган ва шариат қонунларини амалга оширишга чақирган.
“Агар уйингизда шариат қонуни бўлмаса, қандай қилиб мамлакатда шариат қонунларини қўллашга даъво қила оласиз?”, деган у. Охундзода ўз нутқининг бир қисмида улар ҳозирда миллатга масъул эканини қўшимча қилган.
Маълумот ўрнида, “Толибон” ҳукуматида аёлларнинг таълим олишини тақиқлаш борасида келишмовчилик юзага келган. Афғонистон муваққат ҳукумати “Толибон”нинг амалдаги етакчиси Ҳайбатулла Охундзода номига чекловларни бекор қилиш талаби билан хат йўллаган. Охундзода эса мактубга қуйидагича жавоб қайтарган:
“Агар шариат бўйича 12 ёшдан ошган қизлар уйдан ёлғиз чиқиб кетиши мумкинлигини исботласангиз, аёлларга ўқишга рухсат бераман”, — деган у.
Афғонистонда “Толибон” ҳокимиятга келганидан сўнг кўплаб қизларнинг мактабга боришини тақиқлаган, 2022 йил декабрида эса Олий таълим вазирлиги аёлларнинг олий маълумот олишига тақиқ жорий қилган. Бу қарор “Толибон” ҳукумати орасида норозиликка сабаб бўлган, қаршилик шу даражада жиддийлашганки “Толибон”нинг юқори мартабали амалдорлари Охундзодани тахтдан ағдаришни кўриб чиқмоқда.