Венесуэла АҚШ билан урушга тайёрланяпти

Венесуэла президенти Николас Мадуро АҚШнинг Кариб денгизи минтақасига ҳарбий кемалар юбориш қарорига жавобан умуммиллий сафарбарликка тайёргарлик кўраётганини эълон қилди. Унинг айтишича, расмий баёнот шанба ёки якшанба куни эълон қилинади.

Мадуро бу қадам АҚШнинг Венесуэла яқинидаги Кариб денгизига учта ҳарбий кема юбориш қарорига жавоб бўлишини таъкидлаган.

У Каракасдаги парадда сўзга чиқиб, Венесуэла таҳдидларга бўйсунмаслигини уқтирган. Шунингдек, мамлакат халқи мустақиллик ва ҳудудий яхлитликни ҳимоя қилишга тайёр эканлигини айтган.

“Олий бош қўмондон сифатида мен халқ лашкари, захирадагилар ва ихтиёрий равишда қўшилишга тайёр бўлган барча фуқароларга мурожаат қилиб, уларни Миллий суверенитетни ҳимоя қилиш ва тинчликни сақлаш режасида иштирок этишга чақираман. Венесуэла тинчлик истайди, ва агар Венесуэла тинчлик истаса, тинчлик бўлади”, деди Мадуро.

“Тинчлик майдонлари” жамоат хавфсизлиги дастури доирасида Миллий лашкар кучлари аллақачон мамлакатнинг 5336 та ҳудудига жойлаштирилган. Ушбу ташаббус аҳоли яшайдиган ҳудудлар ва муниципалитетларда хавфсизлик кучларининг ҳаракатларини ташкил этиш ва мувофиқлаштириш мақсадини кўзлаган.

Президентнинг айтишича, Венесуэла фақат ўз кучига таянади.

“Биз, Чавес қилганидек, империалистик АҚШга ҳарбий қарамликни, шунингдек, уларнинг босқинчи кучлар орқали Лотин Америкасига тўнтаришлар, мафкуравий, институционал ва сиёсий бўйсундиришни мажбурлаш уринишларини рад этдик”, деди президент.

У мамлакат АҚШдан келадиган барча таҳдидларни енгиб ўтишини айтган. Унинг сўзларига кўра, халқ, қуролли кучлар ва полициянинг бирлиги Венесуэлани ҳимоя қилиш учун асос бўлади.

“Бутун дунё билсин, империялар билсин: Венесуэлада бугун ҳар қачонгидан ҳам кўпроқ имкониятлар бор. Шунинг учун биз тинчликда яшаяпмиз ва тинчликда яшашда давом этамиз”, деди у.

19 август куни Мадуро АҚШнинг навбатдаги босимларига жавобан 4,5 миллиондан ортиқ милиция ходими сафарбар қилинишини маълум қилганди. 

Август ойи бошида АҚШ Венесуэла президенти Николас Мадуро боши учун 50 млн доллар мукофот пули эълон қилганди.