Жорий йилдан бошлаб Бухоро шаҳрида ҳар икки йилда бир марта халқаро замонавий санъат биенналеси ўтказилади. Бу бўйича президент қарори имзоланди.
Қарорга кўра, биеннале сентябрь-ноябрь ойларида бўлиб ўтади. Биринчи Биеннале 2025 йил 5 сентябрдан 20 ноябргача ташкил этилади.
Ҳужжатда мазкур тадбирни ўтказиш орқали Ўзбекистонни жаҳон маданий харитасидаги нуфузини ошириш кўзлангани қайд этилган. Шу билан бирга, замонавий санъат, тарихий мерос, креатив иқтисодиёт ва туризм уйғунлигини таъминлаш режа қилинган.
Биенналенинг асосий мақсадлари этиб қуйидагилар белгиланган:
- мамлакатда замонавий ва амалий санъат, ҳунармандчиликни қўллаб-қувватлаш ҳамда глобал маданий маконга интеграция қилиш;
- креатив саноатда таълим, тадқиқот ва касбий маҳоратни ривожлантириш, Ўзбекистонлик ижодкорларни жаҳонга машҳур уста-ижодкорлар билан ҳамкорлигини йўлга қўйиш орқали халқаро даражага олиб чиқиш;
- мамлакат сайёҳлик жозибадорлигини ошириш, маданий мерос объектларини санъат намойиши майдонларига айлантириш, мунтазам қайта ташриф буюришга бўлган қизиқишни шакллантириш.
Қарорга асосан, Маданият ва санъатни ривожлантириш жамғармаси ташкилий қўмитанинг ишчи органи ҳисобланади.
Биринчи биеннале ўтказиладиган 14 та маданий мерос объектини кўргазма ва тадбирлар, таълим ва тадқиқот, ижодиёт ва ишлаб чиқариш жараёнлари уйғунлашган креатив кластерга айлантирилади.
Жаҳонга машҳур уста-ижодкорлар томонидан 60 тадан кўп арт-объект, шу жумладан, инсталляцияларни яратиш, улардан Биеннале ўтказиладиган жойни бадиий безашда фойдаланиш ва уларнинг энг муносибларини дунё бўйлаб кўргазмаларда намойиш этилади.
Дунёга таниқли ижодкор, мутахассис ва ошпазлар иштирокида кенг жамоатчилик учун 10 ҳафталик илмий-маърифий, маданий-кўнгилочар, сайёҳлик ва гастрономик дастурларни ташкил этилади.
Биринчи Биеннале махсус каталоги ва ўзбек миллий таомлари рецептлар китоб-альбомини чоп этиш, улардан халқаро миқёсдаги тарғибот воситаси ва совғалар тўплами сифатида кенг фойдаланиш режалаштирилмоқда.
Қарорда Бухоро биенналеси ҳақида ҳужжатли фильм яратиш, шунингдек, ундан фойдаланиб мамлакат сайёҳлик салоҳиятини тарғиб қилиш ҳам белгиланган.
Ўз навбатида махсус таълим дастури асосида халқаро даражадаги кураторларни тайёрлаш ҳамда уларнинг жаҳоннинг етакчи санъат майдонларида Ўзбекистон номидан иштирок этишини таъминлаш кўзда тутилган.
Тадбир доирасида 30 нафардан ортиқ халқаро эксперт, куратор ва санъацҳунослар иштирокида халқаро академик симпозиумни ўтказилади.
Изоҳ (0)