7-mart kuni Netflix striming xizmatida Pak Po Gom va Ayyu (Li Ji In) bosh rollarni ijro etgan “Hayot senga mandarin bersa” nomli premyerasi bo‘lib o‘tdi. Bu yilning eng qiziqarli loyihalaridan biri bo‘lib, u taqdirga qarshi chiqib, muhabbatni tanlagan oddiy insonlarning hayoti haqida hikoya qiladi.
1. Muhabbat, hayot va oila haqidagi tarixiy saga
Dorama bolaligidanoq isyonkor tabiatli, kitoblarga o‘ch va shoira bo‘lishni orzu qilgan E Sun ismli kambag‘al qiz hamda doimo uning yonida bo‘lib, har jihatdan qo‘llab-quvvatlab kelgan kamgap yigit Kvan Sik haqida hikoya qiladi. Bosh qahramonlarning qissasi 1960-yillarda Jeju orolida boshlanib, bir necha o‘n yillar davomida rivojlanadi. Shu bois uni muhabbat, hayot va oila haqidagi chinakam tarixiy saga deyish mumkin. Dastlabki to‘rt qismning o‘zidayoq ko‘plab voqealar ro‘y beradi. Otasining vafoti, onasi bilan murakkab munosabatlar va uning kasallik tufayli bevaqt o‘limi kichkina E Sun zimmasiga ulkan hayotiy sinovlarni yuklaydi hamda uning barcha orzu-umidlarini ayovsiz voqelikka ro‘baro‘ qiladi.
Bosh qahramonlarning ulg‘ayishi ularning hayotiga nafaqat kundalik bozordagi karam savdosini, balki Pusan shahriga sarguzashtlarni ham olib kiradi. Isyonkor E Sun va Kvon Sik nima bo‘lishidan qat’i nazar, sevgini tanlaydilar. Ekranlarda vazmin oilaviy drama, orzu-xayollarga to‘la yoshlik, isyon, ulg‘ayish va samimiy muhabbat haqidagi romantik hikoya, shuningdek, yillar davomida o‘zgarib borgan Jeju orolidagi oddiy odamlar hayotining tarixiy manzarasi namoyon bo‘lmoqda.
2. Pak Po Gomning kichik ekranlarga qaytishi
“Hayot senga mandarin bersa” dramasi mashhur koreys aktyori Pak Pogomning kichik ekranlarga qaytganini tasdiqladi. Uning qahramoni Kvon Sik kamgap, biroq g‘oyatda g‘amxo‘r va mehribon yigit. U butun umri davomidagi sevgilisini himoya qilishga va doimo qo‘lidan tutib yurishga tayyor. Ba’zida uning xatti-harakatlari bolalarcha sodda, ba’zida nihoyatda jasur, ba’zida esa aqlbovar qilmas tuyuladi, chunki u har qanday vaziyatda ham chin yurakdan sevishini isbotlaydi. Pak Pogom dastlabki to‘rt qismda tomoshabinlar oldida turli qiyofalarda namoyon bo‘ladi: qizil sport kiyimidagi sabzavot sotuvchisi va kostyum-shim kiygan qochqinidan tortib, oilasi uchun har qanday qiyinchilikka bardosh berishga tayyor baliqchigacha.
3. Ayyuning yangi murakkab roli
Ayyu (Li Ji Yin) avvalo qo‘shiqchi sifatida mashhur, biroq “Prodyuserlar”, “Qizil yurak” va “Del Luna mehmonxonasi” seriallaridagi rollari bilan u iste’dodli aktrisa ham ekanligini isbotladi. “Hayot senga mandarin bersa” filmida uning qahramoni E Sun oddiy kambag‘al qiz, ammo murakkab fe’l-atvorga ega, og‘ir davrda yashaydi va hayotida turli xil voqealar ro‘y beradi.
Ayyu qahramonining yorqin obrazini yaratish uchun turli detallardan foydalanadi. Misol uchun, juda sergap va hissiyotli E Sunning ovozida soddalik va tajribasizlik ohanglari seziladi, bu esa uning sarguzashtlarga va hatto aqlsiz xatti-harakatlarga tayyorligiga zid keladi. Oilasi uchun o‘zini qurbon qilishga tayyor qizning fidoyiligi, E Sun boshqa birov uning farzandi taqdirini hal qilmoqchi bo‘lganida namoyon qiladigan prinsipial qat’iyatlilik bilan yonma-yon turadi.
4. Bir oila tarixiga turlicha qarash
“Hayot senga mandarin bersa” asari voqealari uzoq yillar davomida rivojlanib borishi tufayli bir oila tarixini turli nuqtayi nazardan ko‘rsatish imkoniyatiga ega. Birinchisi, E Sun va Kvan Sikning yoshlik davri bo‘lib, unda she’riyat haqidagi orzular, an’analar va istaklarga zid bo‘lgan sevgi, yosh ota-onalarning farzandi yonidagi chin quvonch va baxtli onlari hamda kambag‘al oiladagi mashaqqatli hayot tasvirlangan.
Ikkinchi nuqtayi nazar — Mun So Ri va Pak Xe Jun ijro etgan yetuk yoshdagi E Sun va Kvan Sikning jo‘shqin yoshligi haqidagi mulohazalari. Ular qaysi voqealarni hayotlaridagi burilish nuqtasi deb bilishadi, qaysilarini esa farzandlariga aytishni lozim ko‘rishmaydi. Dorama ko‘targan eng qiziqarli savollardan biri shuki, bosh qahramonlar ko‘p yillar oldin qilgan tanlovlaridan pushaymon bo‘lmadilarmi? Ular boshqalarning maslahatiga quloq solganlarida ko‘proq narsaga erishishlari mumkinmidi yoki bu ularning hayotini yanada og‘irlashtirgan bo‘larmidi?
Uchinchi rakurs — bosh qahramonlarning katta qizi Yang Kim Myongning qarashi bo‘lib, bu rolni ham Ayyu ijro etadi. Qiz qashshoqlik tufayli bolaligida ko‘p narsadan mahrum bo‘lganini his qiladi, biroq ota-onasining mehrini doimo his etgan. Onasi kabi uning ham hayotda yangi cho‘qqilarni zabt etish istagi va intilishlari bor, shuningdek, ota-onasi qabul qilgan qarorga nisbatan o‘z nuqtayi nazari mavjud. Drama qahramonlari taqdiri orqali mualliflar ayollarning doimiy o‘zgarib borayotgan dunyodagi o‘rni haqida ham mulohaza yuritadilar.
5. Vizual go‘zallik va davr manzarasi
Doramaning yana bir afzalligi uning vizual go‘zalligidir. Somon suvoq qilingan qishloq uylari, Cheju orolining ajoyib sohili, doimo hayot qaynayotgan bozor, bularga qarama-qarshi Pusan ko‘chalari va barcha davrlarni qizil ip kabi bog‘lab turadigan go‘zal sariq maydon ko‘zni quvontiradi. Qahramonlarning xilma-xil liboslari va tashqi ko‘rinishlari, shuningdek, ekranda tez-tez paydo bo‘ladigan turli xil eski televizorlar, bolalar velosipedlari, ventilyatorlar, peyjerlar va o‘tmishdan qolgan boshqa qiziqarli narsalar e’tiborni tortadi.
“Hayot senga mandarin bersa” dramasi bilan bog‘liq yana bir qiziqarli jihat — uning efir jadvali. Netflix xizmatining barcha seriyalarni bir kunda chiqaradigan odatiy drama ko‘rsatish tartibi bu safar o‘zgardi. O‘n olti qismli drama haftasiga to‘rt qismdan efirga uzatiladi.
Izoh (0)