Irlandiya poytaxti Dublinda 59 yoshli erkak shifokor tavsiyasiga binoan ko‘p miqdorda suv ichib, suv intoksikatsiyasidan vafot etdi. Bu haqda Daily Mail xabar berdi.
Bu kasallik tibbiyotda giponatriyemiya deb ataladi. Shifokorlar jang san’ati afsonasi Bryus Lining o‘limiga ham shu kasallik sabab bo‘lgan deb taxmin qiladi.
Yetarli miqdorda suv ichish sog‘liq uchun muhim bo‘lsa-da, ortiqcha va tez-tez suv ichish qon tarkibidagi natriy darajasini pasaytirishi mumkin. Natriy to‘qimalardagi suv miqdorini boshqarishga yordam beradigan elektrolitdir. Agar uning darajasi pasaysa, suv tana hujayralari ichida va atrofida to‘plana boshlaydi. Bu esa hujayralarning shishishiga sabab bo‘ladi.
Jarayon ayniqsa bosh miya uchun xavfli, chunki bosh suyagi qattiq bo‘lgani uchun kengaya olmaydi. Mutaxassislar bir soat ichida 1,4 litr suv (taxminan olti stakan) ichish bu holatni keltirib chiqarishini aytmoqda.
Ba’zi tadqiqotlarga ko‘ra, giponatriyemiya bilan og‘rigan har to‘rtinchi bemor vafot etadi. Kuniga ikki litr suv ichish — sakkiz stakan atrofida — tanani suv bilan ta’minlash uchun juda muhim (rasmda chapda).
AQSH Kasalliklarni nazorat qilish va oldini olish markazi soatiga 1,4 litrdan ko‘p suv ichmaslikni tavsiya qiladi. Bu maslahat barcha suyuqliklarga tegishli. Giponatriyemiya ba’zi zaif bemorlarda normal suv iste’moli bilan ham yuzaga kelishi mumkin.
Sutka davomida 7-8 litr suv ichganlar kasalxonaga yotqizilgan holatlar bo‘lgan. Bu har uch soatda bir litr suv ichishga teng. Buyrak yetishmovchiligidan aziyat chekadiganlar ko‘proq xavf ostida bo‘ladi. Sababi ularning tanasi ortiqcha suyuqlikni organizmdan tez chiqara olmaydi.
Tadqiqotchilar fikricha, kung-fu bo‘yicha mutaxassis Bryus Li ko‘p suv ichganidan vafot etgan bo‘lishi mumkin. U 1973-yilning yozida Gonkongda 32 yoshida olamdan o‘tgan. Jang san’ati ustasi va Gollivud yulduzi miya shishidan vafot etgan, o‘sha paytda shifokorlar buni og‘riq qoldiruvchi vositalar bilan bog‘lagan.
Izoh (0)