Bryus Uillis 70 yoshda: hozirda demensiya tufayli tildan qolgan aktyor Gollivud tarixida qanday iz qoldirdi?

Gollivud aktyori, ko‘plab sevimli filmlar yulduzi Bryus Uillis shu yilning 19-martida 70 yoshga to‘ldi. Uning qahramonlari dangasa, ichkilikboz va odamovi shaxslar bo‘lsa-da, ayni paytda ular doimo o‘zlarining insoniy nomukammalligi, jozibasi va o‘z ustidan kulishi bilan tomoshabinlarni o‘ziga rom etardi.

Nyu Jersidan kelgan yanki

Bryus Uillis GFRda xizmat qilayotgan amerikalik harbiy oilasida Germaniyaning Idar Obershteyn shahrida tug‘ilgan. 1950-yillarning oxirida otasining harbiy shartnomasi tugagach, oila Nyu Jersiga ko‘chib o‘tadi. U yerda Bryusning yana to‘rtta ukasi va singlisi dunyoga keladi. Qizig‘i shundaki, Uillisning aktyor bo‘lishiga duduqlanishi sabab bo‘lgan. Nutqidagi bu nuqson muloqot qobiliyatiga unchalik ta’sir qilmasa-da, maktabdagi o‘zlashtirishiga jiddiy zarar yetkazgan.

Duduqlanishni yengish uchun u maktab drama to‘garagiga yoziladi va tez orada “Qirol Artur saroyidagi konnektikutlik yanki” pyesasida rol o‘ynaydi. Bryus sahnaga chiqqanida duduqlanishi yo‘qolar, ammo tomoshabinlar oldiga tushishi bilanoq yana paydo bo‘lardi. Maktab teatri sahnasiga muntazam chiqishlar bo‘lajak aktyorga uzoq kutilgan o‘ziga ishonchni shakllantirishga yordam beradi. Bu esa, o‘z navbatida, duduqlanishning butunlay yo‘qolishiga olib keladi.

Oy yorug‘idagi izquvar

Bryus Uillisning birinchi e’tiborga loyiq ishi “Oy nuri detektiv agentligi” (1985-1989) seriali bo‘ldi. Unda u o‘sha paytda juda mashhur aktrisa bo‘lgan Sibill Shepard bilan birga rol ijro etadi. E’tiborli jihati shundaki, dastlab yangi aktyorni izquvar Devid Edison roliga olishni istashmaydi — kasting direktori uning soch turmagi, qulog‘idagi ziragi va xaki rangidagi kiyimlaridan hayron qoladi. Biroq serial rejissyori Glenn Gordon Karon yosh aktyorda katta salohiyat, “dovyuraklik va joziba”ni ko‘radi va oxir-oqibat uning nomzodini qat’iy himoya qiladi.

Oddiy yigit — jangari film qahramoni

Ishonish qiyin, ammo Bryus Uillis hech qachon studiyaning birinchi tanlovi bo‘lmagan. 20th Century Fox rahbarlari Jon Makkleyn rolini katta-kichik barchaga taklif qilishgan — politsiyachi rolini o‘ynash uchun Arnold Shvarsenegger va Silvestr Stallonedan tortib Frank Sinatra va Al Pachinogacha ko‘rib chiqilgan. Biroq Jon Makkleyn obraziga o‘ziga xos qarash bilan sinovlarga kelgan yagona inson Uillis bo‘lgan.

Los Anjelesga xotini bilan yarashish uchun kelgan nyu yorklik nafaqadagi politsiyachi hech qachon Devid Edisonning yoshlikdagi soddaligiga ega bo‘lmagan, aksincha — Bryus Uillis gavdalantirgan qahramon hayot tomonidan ancha ezilgan, kinoyali va o‘z tabiatiga nisbatan ortiqcha xayollarga berilmaydigan odam edi.

U namunali er yoki politsiyachi unvoniga deyarli munosib emasdi, g‘azabini nazorat qilishda muammolarga duch kelardi, ammo, ajablanarlisi, o‘z ishini yaxshi bilar va garchi ajrashgan bo‘lsa-da, xotinini chin dildan sevardi. Makkleynning ziddiyatli ichki yumshoqligi, shuningdek, beparvoligi dinamik jang sahnalarida — uni doimo hissiyotsiz bo‘lgan Stallone va Shvarsenegger kabi “keldi, ko‘rdi, g‘alaba qozondi” formulasi asosida kinoda harakat qiladigan qahramonlardan ajratib turardi.

Jeyms Kemeronning filmlari tomoshabinlarni harakatli sahnalar va innovatsion vizual effektlar bilan o‘ziga rom etgan. Oddiy va takrorlanuvchi g‘oyalar bilan to‘lib-toshgan “O‘tda yonmas” franshizasi Makkleyn fe’l-atvori tufayli 25 yil davomida o‘zini saqlab qoldi. Makkleyn hech qachon qahramon bo‘lishga intilmagan, ammo doimo oddiy yaxshi yigit bo‘lib qolavergan.

Fojia va komediya ustasi

Bryus Uillis — tijoriy jihatdan muvaffaqiyatli ekshn franshizalarining sanoqli aktyorlaridan biri bo‘lib, u so‘zi va ishi bilan nafaqat qurol ko‘targan sovuqqon erkaklar rolini, balki murakkab, serqirra qahramonlarni ham mahorat bilan ijro eta olishini isbotlagan. Bunday o‘zgarishning yorqin namunasi M. Nayt Shyamalanning “Oltinchi hissiyot” mistik trilleri bo‘ldi. Unda Uillis chindan ham g‘ayrioddiy bemor bilan to‘qnash kelgan bolalar ruhshunosi qiyofasiga kiradi. Shubhasiz, filmning asosiy yulduzi yosh Heyli Joel Osment edi, biroq Bryus ham uning soyasida qolib ketmadi — tushkun kayfiyatli doktor Malkolm Krouv Uillisning boshqa rollaridan keskin farq qilardi.

“To‘qqiz yard”, “To‘lin oy qirolligi”, “O‘lim unga yarashadi” kabi filmlar aktyor uchun kamdan kam uchraydigan, komedik rollar bo‘lib qoldi.

Bryus Uillisning so‘nggi yirik roli Edvard Nortonning “Yetim Bruklin” nomli rejissyorlik debyuti bo‘ldi. Bu filmda u qidiruv agentligi boshlig‘i Frank Minna rolini ijro etdi. Shunday qilib, u qisman bo‘lsa-da, o‘zining aktyorlik ildizlariga — mashhur “Oydin kecha detektiv agentligi” serialiga qaytdi.

Demi Mur bilan hayoti

1987-yilda aktyor Gollivuddagi ziyofatda Demi Mur bilan tanishadi. O‘sha paytda Demi hali taniqli bo‘lmagan, birinchi nikohidan ajrashgan aktrisa edi. Ular tezda til topishadi, tanishganlaridan to‘rt oy o‘tgach, turmush qurishadi.

1988-yilda Demi homiladorligini e’lon qilganida Bryus baxtdan boshi osmonda edi. Ularning hayoti butunlay o‘zgaradi. Bryus namunali otaga aylanadi, kichkintoy Rumerni jon-dilidan sevardi.

O‘sha paytda Bryus har xil janrlarda o‘zini sinab ko‘rdi, komediyalarda yarqiradi, musiqa bastaladi, o‘z filmlarini ishlab chiqardi, do‘stlari bilan biznes yo‘lga qo‘ydi va oilaviy hayotdan lazzat oldi. Bryus va Demining yana ikki qizi dunyoga keldi: 1991-yilda Skaut va 1994-yilda Talula.

1998-yilda Uillis va Mur ajrashayotganlarini e’lon qilishdi. Bu juftlikning boshiga nimalar tushganini hech kim aniq bilmaydi. Xiyonat, yopiq eshiklar ortidagi janjal va mushtlashishlar, Bryusning xiyonati haqidagi mish-mishlar tarqaladi.

Ajrashgandan so‘ng, Bryus model Emma Hemming bilan uchrasha boshladi. Emma esa unga so‘nggi o‘n yil davomida orzu qilgan xotirjamlikni tuhfa etdi. 57 va 59 yoshida Bryus yana otalik baxtiga erishdi. U Emma bilan Meybl va Evelin ismli qizlarni dunyoga keltirdi.

2022-yilning mart oyida aktyor Bryus Uillisning oila aʼzolari uning ijodiy faoliyati yakuniga yetgani, Gollivud yulduzida afaziya — bosh miya qobig‘i shikastlanishi natijasida yuzaga keladigan nutq buzilishi aniqlanganini maʼlum qilgan edi.

Demensiya dahshatli neyrodegenerativ kasallik bo‘lib, hech kimni ayamaydi. Hozirda Bryus sobiq xotinini tanimasa ham, xayriyatki, hali ham xotini Emma va uning bolalarini taniydi. Aktyorning oila a’zolari — rafiqasi Emma Hemming, qizlari va hatto sobiq rafiqasi Demi Mur hamisha uning holidan xabar olib turadi.

Maʼlumotlarga ko‘ra, aktyorning ahvoli kundan kunga yomonlashib bormoqda. Endi u o‘qiy olmaydi va umuman so‘zlasha olmaydi ham. Oilasi uni qo‘llab-quvvatlash uchun aktyor bilan ko‘proq vaqt o‘tkazishga harakat qilmoqda. Vaqti-vaqti bilan ijtimoiy tarmoqlarda uning sog‘lig‘i haqida maʼlumotlar ham berib borishyapti.