Janubiy koreyalik ba’zi aktyorlar nafaqat Osiyoda, balki Gollivudda ham muxlislar orttirishga ulgurgan.
Li Byon Xon
U “G.I. Joe: kobra zarbasi” va “G.I. Joe: qasos”, shuningdek, “RED 2” filmlaridagi rollari bilan mashhur. Gollivudning Chenning Tatum, Jozef Gordon-Levitt, Dueyn Jonson, Bryus Uillis, Jon Malkovich kabi yulduzlari bilan birga suratga tushgan.
Bundan tashqari, Arnold Shvarsenegger va Emiliya Klark bilan birgalikda “Terminator: genezis” filmida asosiy salbiy qahramon rolini ijro etgan.
Ma Don Sok
Don Sok “Umrboqiylar” filmida Gilgamish rolini ijro etgan. Bu Marvel komikslariga asoslangan Amerika superqahramonlar filmi bo‘lib, Marvel kinematografik olamining 26-filmi hisoblanadi. Don Sok Salma Hayek va Anjelina Joli kabi mashhur Gollivud yulduzlari bilan rol o‘ynagan.
Li Jun Ki
Jun Ki “Yovuzlik makoni: so‘nggi bob” filmida Ambrella qurolli kuchlarining a’zosi bo‘lgan qo‘mondon Chu rolini ijro etdi.
Bu xuddi shu nomdagi video o‘yinga asoslangan mashhur filmlar turkumining oltinchi va yakuniy qismidir. Bosh qahramon Elis (Milla Yovovich) virus tarqalishi boshlangan Rakkun Sitiga qaytib, Ambrella korporatsiyasini butunlay yo‘q qilishga urinadi. Film o‘zida jang, dahshat va ilmiy fantastika unsurlarini mujassam etib, Elisning zombi hamda mutantlarga qarshi kurashi haqidagi hikoyasini yakunlaydi.
Pak So Jun
O‘tgan yilning 10-noyabrida Pak So Jun o‘zga sayyoralik shahzoda Yan roli bilan Gollivudda debyut qildi. “Marvellar” filmida So Junning ekrandagi vaqti atigi ikki-uch daqiqani tashkil etdi, bu esa uning muxlislarining hafsalasini pir qildi.
Uning qahramoni — odamlar musiqiy tilda so‘zlashadigan Aladna sayyorasini boshqaradigan shahzoda Yan. So Jun o‘z roli ustidagi ishini shunday sharhladi: “Menimcha, men kuylaydigan qo‘shiqlarni yaratishdan oldin, ular qo‘shiq aytishimda muammo bo‘lmasligi uchun ovoz diapazonimni tekshirganlar. Bu sahnalarni suratga olish paytida yaxshi qo‘shiq aytishdan ko‘ra qahramonning his-tuyg‘ularini yetkazishga ko‘proq e’tibor qaratishga intildim”.
Pe Duna
Bir nechta yirik Gollivud filmlarida rol olgan koreys aktrisasi. U “Bulutli Atlas” filmida Sonmi-451 obrazini gavdalantirgan. Sonmi-451 2144-yilda Neo-Seul deb nomlangan kelajakdagi jamiyatda yashovchi klondir. U kafeda ishlab, asta-sekin o‘z jamiyatining shafqatsiz mohiyatini va o‘zining haqiqiy vazifasini anglay boshlaydi. Sonmi qarshilik ramziga aylanadi va zulmkor tuzumga qarshi inqilobni ilhomlantiradi.
Izoh (0)