Kino sanoati doimo nomini tarixga muhrlab, davr timsoliga aylanadigan yangi iste’dodlarni izlaydi. Ushbu maqolada karyerasi va rollarini tanlashi o‘tmishdagi afsonaviy yulduzlarning yo‘lini eslatuvchi aktyorlar haqida ma’lumot beramiz. Ehtimol, yaqin orada ularning ismlari Gollivud yulduzlari bilan bir qatorga qo‘shilar.
Pol Meskal — Rassel Krou
Pol Meskalning yulduzlik onlari “Oddiy odamlar” seriali bilan boshlandi. Bu loyiha unga shuhrat keltirdi va katta kino olamiga yo‘l ochdi. Bu uning birinchi roli edi. Aktyor bo‘lishdan avval Pol istiqbolli sportchi bo‘lib, Irlandiyaning milliy sporti hisoblangan — gel futbolida o‘ynagan.
2024-yilda Pol afsonaviy “Gladiator” filmining davomida bosh rolni ijro etdi. Uning qahramoni Lutsilla va Maksimus personajlarining o‘g‘li. Qizig‘i shundaki, Pol bu rolni rejissyor Ridli Skott bilan 30 daqiqalik Zoom suhbatidan so‘ng qo‘lga kiritdi. Bu filmdagi ishi, tabiiyki, Maksimus roli uchun “Oskar” mukofotini qo‘lga kiritgan Rassel Krou bilan taqqoslanishga sabab bo‘ldi.
Joui King — Natali Portman
Joui King 25 yosh bo‘lishiga qaramay, istiqbolli aktrisalaridan biri hisoblanadi. Joui allaqachon jahon yulduzlari bilan birga suratga tushishga ulgurgan, masalan, “O‘qdan tez” filmida Brad Pitt bilan rol ijro etgan. Jouini Natali Portman bilan taqqoslashadi. Ular nafaqat tashqi ko‘rinishi, balki rollarga dadil yondashishlari bilan ham o‘xshash. Misol uchun, Joui “Akt” seriali uchun sochini oldirgan — xuddi 2005-yilda rol uchun sochini qirdirgan Natali Portman singari. Ikkala aktrisa ham murakkab va dramatik rollarda chuqur hissiyotlarni yetkazish qobiliyati bilan tanilgan.
Jenna Ortega — Vaynona Rayder
Jenna Ortega 2002-yil 27-sentyabrda tug‘ilgan. U o‘z faoliyatini 9 yoshida boshlagan. Ammo aktrisa 2022-yilda Addamslar oilasining to‘ng‘ich qizi obrazini gavdalantirgan “Uenzdey” serialidagi rolidan so‘ng katta muvaffaqiyatga erishdi.
2024-yilda 80-yillarning “Bitljus Bitljus” xitining davomi chiqdi, filmda Jenna birinchi qismning yulduzi Vaynona Rayder bilan rol o‘ynadi. Ba’zi nashrlar aktrisalarning o‘xshashligini ta’kidlaydi. Ikkalasi ham g‘ayrioddiy janrlarda rol o‘ynashga intiladi va standart Gollivud qiyofasiga emas, balki boshqalardan ajralib turadigan noyob ko‘rinishga ega. Vaynona Rayderga o‘xshashlik Jennani Gollivudda o‘ziga ishonch bilan yo‘l ochadigan, g‘ayrioddiy rollari bilan tomoshabinlar mehrini qozongan munosib vorisiga aylantiradi.
Jeykob Elordi — Bred Pitt
Jeykob Elordi — avstraliyalik aktyor, 1997-yil 26-iyunda tug‘ilgan. Intervyularidan birida Jeykob bolaligidan Bred Pittga havas qilishini aytgan. Pitt singari Elordi ham yengil romantik obrazlardan tortib, ko‘p qirrali va murakkab personajlargacha bo‘lgan rollar bilan faol tajriba o‘tkazadi. Ikkala aktyor ham o‘z filmlarida ko‘pincha mustaqil ravishda tryuklarni ijro etishadi.
Fibi Daynevor — Kira Naytli
Fibi Daynevor “Brijertonlar” serialidagi Dafna roli tufayli mashhur bo‘ldi. Biroq Fibi tarixiy rollarga bo‘lgan muhabbatini bundan ancha oldin namoyon qilgan: u “Mushketyorlar” serialida rol o‘ynagan. Ko‘pchilik uni Kira Naytliga o‘xshatadi.
Ikkala aktrisa ham faoliyatini yoshligida boshlagan va tezda muvaffaqiyatga erishgan. Ularning kelib chiqishi Britaniyaga borib taqaladi, bu esa ularning tarixiy filmlardagi ijrosiga o‘ziga xoslik baxsh etadi. Kira singari Fibi ham mashhur loyihalar va jiddiy kino o‘rtasida muvozanat saqlaydi.
Jaden Martell — Leonardo DiKapri
Jaden Martell faoliyatini juda erta boshlagan, u birinchi bosh rolini 10 yoshida “Avliyo Vinsent”filmida o‘ynagan. Keyingi bir necha yil ichida Jaden 10 dan ortiq filmlarda rol o‘ynadi.
Uning karyerasi Leonardo DiKaprio faoliyatining dastlabki yillarini eslatadi, u ham hissiy boy va psixologik jihatdan murakkab rollardan boshlagan. DiKaprio birinchi marta ikki yoshida spektakl festivalida raqsga tushib, e’tiborni tortadi. Keyinchalik u 20 ta reklama roligida suratga tushib, Robert De Niro bilan “Bir yigitning hayoti” filmida rol o‘ynadi.
Josh Rivera — Jon Travolta
Josh Rivera — “Vestsayd tarixi” musiqiy filmidagi roli bilan tomoshabinlar e’tiborini tortgan yulduz. Maktabda Josh futbol o‘ynagan, shuningdek, musiqa va teatr bilan shug‘ullangan, keyin esa kollejda musiqali teatr bo‘yicha bakalavr darajasini olgan.
“Vestsayd tarixi” musiqiy filmi Joshning kinodagi debyuti bo‘lgan. Uning yo‘li otasi professional futbolchi bo‘lgan Jon Travoltaning karyerasini eslatadi, ammo Jonning yoshligidan aktyorlikni tanlaydi. Travoltani yulduzga aylantirgan filmlar “Shanba oqshomi vasvasasi” va “Briolin” musiqiy filmlari bo‘lib, u ajoyib vokal va raqs mahoratini namoyish etadi.
Bugungi kunda Josh o‘zining iste’dodi va xarizmasi tufayli Travoltaning munosib vorisi bo‘lib, yangi avlod tomoshabinlarining qalbini zabt etishga tayyor.
Izoh (0)