Xonanda va aktrisa Selena Gomes va uning qallig‘i, musiqiy prodyuser Benni Blanko o‘zlarining birinchi uyi — 35 million dollarlik hashamatli uy xarid qildi. Bu haqda TV.mail.ru xabar berdi.
Jurnalistlarning so‘zlariga ko‘ra, o‘tgan yilning dekabr oyida yulduzli juftlik Beverli Xillda ispancha uslubda qurilgan hashamatli hovliga sarmoya kiritgan. To‘yga qizg‘in tayyorgarlik ko‘rayotgan Benni va Selenaning yangi uyida 7 ta yotoqxona, 12 ta hammom, katta kutubxona mavjud. Uyning kirish qismida aylanma zinapoya bo‘lib, u orqali boshqa xonalarga o‘tish mumkin.
Hovlida oranjereya-issiqxona, fitnes markazi, solyariy va ikkita basseyn ham mavjud. Ilgari ushbu ko‘chmas mulk egasi mashhur Gollivud rejissyori bo‘lgan, ammo uning ismi oshkor etilmadi.
Selena o‘zining hamkasbi, musiqiy prodyuser Benni Blanko bilan tanishganiga o‘n yildan oshgan. Blanko xonandaning eng xit qo‘shiqlariga prodyuserlik qilgan. Jumladan, ular birgalikda 2015-yilda “Same Old Love”, 2021-yilda “I Can’t Get Enough” kabi mashhur taronalar ustida ishlagan.
2024-yil dekabr oyida Selena Gomes o‘zining prodyuseri Benni Blankoga turmushga chiqayotgani haqida o‘zining Instagram’dagi sahifasida e’lon qildi. Ularning to‘yi Puerto Rikoda bo‘lib o‘tadi, chunki xonandaning qallig‘i o‘sha yerda tug‘ilib o‘sgan. Marosimda kelin-kuyovning yaqin qarindoshlari, do‘stlari, xorijiy yulduzlar, jumladan, Teylor Svift, Bleyk Layvli va Meril Strip kabilar ishtirok etishi rejalashtirilgan.
Izoh (0)