Kinematografiya — ko‘plab insonlar ishtirok etadigan murakkab san’at turi. Ularning har biri filmning ma’lum bosqichida turli vazifalarni bajaradi. Biroq aksariyat odamlar aktyor va aktrisalarning ijrosini ko‘rish uchun kinoga borishadi.
Aktyorlarning o‘z roliga ilhom bilan yondashishi ba’zan o‘rtamiyona filmlarning muvaffaqiyatsizlikka uchramasligiga yordam beradi, hatto bitta ajoyib ijro butun bir filmni qutqarib qolishi ham mumkin. Afsuski, buning aksi ham bo‘lib turadi. Ko‘pchilik tomoshabinlarga yoqqan loyihalarni birgina ijrochi jiddiy buzib qo‘yishi ham mumkin, xuddi quyidagi kino yulduzlaridek.
Meggi Jillenhol — “Qora ritsar” (2008)
Ko‘pchilik “Qora ritsar”ni barcha zamonlarning eng sara kinokomikslaridan biri deb hisoblaydi. Biroq Meggi Jillenholning Reychel Dous rolini bir maromda — hissiz va sovuqqonlik bilan ijro etishini tomosha qilishni hisobga olmasa. Rostdan ham uning butun film davomida yuz ifodasi deyarli o‘zgarmaydi.
Zendeya —“Dyuna: ikkinchi qism” (2024)
Birinchi “Dyuna” (2021) filmida Zendeyaning Chani obrazi juda kam ko‘rinadi va bu, ehtimol, Frank Gerbert romanining ekranlashtirish bo‘yicha asosiy yutuqlaridan biri edi. Ikkinchi qismda Chani asosiy qahramonga aylandi, ammo bu rolni ijro etgan aktrisaning mahorati past ekanligi namoyon bo‘ldi. Zendeyaning personajni yuzaki talqin qilishi va ta’sirsiz ijrosini yaxshilashga hatto u vaqti-vaqti bilan ko‘rsatgan beo‘xshov imo-ishoralar ham yordam bera olmadi.
Kemeron Dias — “Nyu York to‘dalari” (2002)
Kemeron Dias komediyada o‘ta mahoratli, faqat va faqat komediyada. Martin Skorseze Diasni “Nyu York to‘dalari” filmidagi rolga tasdiqlashidan oldin kimdir unga bu haqda aytishi kerak edi. Kemeron ushbu tarixiy jinoyat sagasida hatto unchalik taniqli bo‘lmagan erkaklar tarkibi bilan ham tabiiy ko‘rinmasdi, ammo Leonardo Di Kaprio, Daniel Dey-Lyuis va Liam Nison kabi salobatli aktyorlar oldida uning aktyorlik mahorati butunlay so‘nib qoldi.
Robert De Niro — “Irlandiyalik” (2019)
Robert De Nironing “Irlandiyalik” biografik gangster dramasidagi yosh Frenk Shiran rolida ishonchli ko‘rinishi uchun dunyodagi barcha grimyorlar va kompyuter grafikasi ham yordam bera olmasa kerak. Martin Skorsezening butun hikoya davomida bosh qahramon rolini faqat o‘z do‘stiga berish qarori katta xato bo‘lib chiqdi va hech qanday jihatdan o‘zini oqlamadi. Birorta ham sahnada Gollivud faxriysi yosh yigitdek yurolmadi, gapirolmadi va o‘zini tuta olmadi, bu esa oxir-oqibat filmning ushbu qismidagi muhitni buzib yubordi.
Sofiya Koppola — “Cho‘qintirgan ota 3” (1990)
Frensis Ford Koppola tarix sahifalariga kirgan kamida ikkita eng buyuk kinoloyihani yaratdi — “Cho‘qintirgan ota” (1972) va uning davomini. So‘ngra u uchinchi qismni suratga olishga qaror qildi va Meri Korleone roliga o‘z qizini tanladi. Sofiya Koppola rolini shunchalik yomon o‘ynadiki va har bir kadrda shunchalik beo‘xshov ko‘rindiki, uning qahramoni ekranda bo‘lmagan paytlarda tomoshabin faqat chinakam yengillik his qilardi.
Liv Tayler — “Armageddon” (1998)
Bryus Uillis, Ben Afflek, Stiv Bushemi va boshqalar portlashlar kuchi hamda “Armageddon” mualliflarining fizika va boshqa fanlar bo‘yicha sayoz bilimlari yordamida dunyoni qutqarayotgan bir paytda, Liv Tayler go‘yo pitsa yetkazib berish uch daqiqaga kechikayotganini hozirgina eshitgan odamning hissiy holatini namoyish etmoqda.
Izoh (0)