Jahon kinosi yulduzi Skarlett Yoxanson o‘z hayoti haqida ijtimoiy tarmoqlarda gapirishni istamaydi. Uning hech qaysi ijtimoiy tarmoqda shaxsiy akkaunti yo‘q.
Aktrisaning aytishicha, u bu qarorini hatto reklama bo‘yicha katta shartnomalar uchun ham o‘zgartirishni istamaydi. Yaqinda unga “Yura davri dunyosi: Qayta tirilish” filmining reklama kampaniyasiga qo‘shilish va uni o‘z blogi orqali targ‘ib qilish taklif etilgan. Lekin Skarlett bu taklifni ham rad etgan.
“Hatto bugun ham Universal’dan elektron xat oldim, ular menga ‘Yura davri dunyosi: Qayta tirilish’ filmini ijtimoiy tarmoqlarda targ‘ib qilishda ishtirok etishni taklif qilishdi. Menga katta bosim o‘tkazilyapti. Ijtimoiy tarmoqlarda sahifa ochib, o‘zligimni yo‘qotmaslikning yo‘li bormi? Menimcha, yo‘q”, — deydi aktrisa InStyle nashriga bergan intervyusida.
Skarlett Yoxanson shuningdek, sunʼiy intellektga nisbatan ehtiyotkor munosabatda ekanligini bir necha marta taʼkidlagan. Uni bu borada Nikolas Keyj ham qo‘llab-quvvatlamoqda, aktyor shaxsiy maʼlumotlari uning vafotidan keyin ham foydalanilmasligini taʼminlashga harakat qilmoqda.
Izoh (0)