Kevin Kostner Gollivudning eng yorqin yulduzlaridan biri bo‘lib, ko‘pchilik uni “Tansoqchi” filmidagi mashhur roli bilan eslaydi. Uning xarizmasi, iste’dodi va beqiyos ijrosi aktyorni haqiqiy kino afsonasiga aylantirdi.
Kevin Kostnerning tarjimayi holi
Kevin Kostner 1955-yilning yanvarida Kaliforniya shtatining Linvud shahrida o‘rta hol oilada dunyoga kelgan. Yoshligidanoq san’at va sportga qiziqqan, maktabdagi turli tadbirlarda faol qatnashgan.
U universitetda marketing va moliya sohasida ta’lim olgan, biroq mashhur aktyor Richard Byorton bilan uchrashuvidan so‘ng hayotida burilish yasab, o‘zini kinematografiyaga bag‘ishlashga qaror qilgan.
Kostnerning karyerasi kichik rollardan boshlangan. Rejissyor Lourens Kasdan uni “Silverado” filmida suratga tushishga taklif etganidan so‘ng, bu film uning haqiqiy muvaffaqiyatga erishishi uchun tramplin bo‘ldi.
Tez orada u Gollivudning eng talabgir aktyorlaridan biriga aylanadi, jasur va o‘z qarashlariga ega qahramonlarni xarizmatik tarzda ijro etishi bilan taniladi.
1991-yil yulduz uchun, ayniqsa, omadli yil bo‘ldi — “Robin Gud: o‘g‘rilar shahzodasi” filmidan so‘ng, “Tansoqchi” kartinasi unga olamshumul mashhurlik olib keldi.
Aktyorning so‘nggi yirik loyihalaridan biri “Yelloustoun” seriali bo‘lib, unda Datton oilasi boshlig‘i rolini gavdalantiradi. Uning ijrosi tanqidchilar tomonidan yuqori baholandi, biroq 2023-yilda besh mavsumdan keyin Kostner serialni tark etishga qaror qiladi.
Rejissyorlik faoliyati
Aktyorlik karyerasining cho‘qqisiga erishgan Kevin shu bilan chegaralanib qolmadi va uzoq yillardan beri orzu qilgan maqsadi — rejissyor bo‘lishga qaror qiladi. Uning 1990-yilda ekranlarga chiqqan “Bo‘rilar bilan raqsga tushuvchi” nomli debyut filmi nafaqat tomoshabinlarni maftun etdi, balki kino olamida haqiqiy sensatsiyaga aylanadi.
Film 7 ta “Oskar” mukofotini qo‘lga kiritadi. Bu g‘alaba Gollivud tarixiga kiradi, chunki Kostner ilk ishi bilanoq shunday nufuzli e’tirofga sazovor bo‘lgan kam sonli yangi rejissyorlardan biriga aylanadi.
Ammo mashhur ijodkorning navbatdagi yirik loyihasi — 1997-yilda ekranlarga chiqqan “Pochtachi” filmi muvaffaqiyatsizlikka uchraydi. Film “Oltin malina” antimukofotining asosiy “qahramoni”ga aylanadi. U asosiy nominatsiyalarda beshta sovrinni qo‘lga kiritib, Amerika kinematografiyasi uchun salbiy rekord o‘rnatadi.
Shaxsiy hayoti
1990-yillarning boshida shuhrat cho‘qqisida bo‘lgan aktyor 16 yil birga yashagan birinchi xotini Sindi Silva bilan ajrashadi. Er-xotinning uch farzandi bor edi.
Bu davr aktyor uchun ham kasbiy, ham shaxsiy hayotda qiyin o‘tadi, bu hol uning karyerasiga ta’sir ko‘rsatdi. 1996-yilda ajrashgandan so‘ng, Kostner aktrisa Brijit Runidan Liam ismli nikohsiz o‘g‘il ko‘radi. Umumiy farzandi bo‘lishiga qaramay, er-xotin oila qurmaydi.
2000-yillarning boshida aktyor Kristin Baumgartner bilan tanishadi. 2004-yilda ular turmush qurib, uch farzandning ota-onasi bo‘lishadi. O‘sha paytda er-xotin Gollivuddagi eng mustahkam oilalardan biri hisoblanardi.
Ammo 2023-yilning may oyida 18 yillik nikohdan so‘ng ajrashganliklari ma’lum bo‘ladi. Kristin ajralishning sababini “bartaraf etib bo‘lmaydigan kelishmovchiliklar” deb ko‘rsatadi.
Sud jarayoni o‘sha yilning sentyabr oyida yakunlanadi, natijada Baumgartner huquqiy xarajatlar hamda aliment uchun yaxshigina moliyaviy tovon oladi.
2023-yil oxirida Kevin Jewel taxallusi bilan tanilgan mashhur qo‘shiqchi Juel Kilcher bilan ishqiy munosabatda ekanligi haqidagi mish-mishlar tufayli e’tibor markaziga tushadi. Juftlikni bir necha bor jamoat tadbirlarida birga ko‘rishgan, biroq ularning munosabatlari rasman tasdiqlanmagan.
Shuningdek, aktyor o‘zidan 40 yosh kichik bo‘lgan Reyni Kastaneda bilan munosabatda bo‘lishi mumkinligi haqida ham gap-so‘zlar tarqalgan.
Kostner hozir qanday yashayapti?
Hozirda “Oltin globus”, “Emmi” va “Oskar” mukofotlari sovrindori 70 yoshga to‘ldi. U o‘z faoliyatini yakunlashni rejalashtirmayapti va kino sanoatida faol ishlashni davom ettirmoqda.
Bundan tashqari, mashhur aktyor Modern West guruhi tarkibida xonanda, gitarachi va qo‘shiqlar muallifi sifatida musiqa bilan shug‘ullanmoqda.
2025-yilda aktyorni uchta kinopremyera kutmoqda, shuningdek, guruhi bilan birgalikda konsert safari ham rejalashtirilgan.
Izoh (0)