Ijtimoiy tarmoqlarda Gollivud filmlari ixlosmandlari barcha davrlarning eng yaxshi aktyorini tanladi. Mashhur aktyorlardan Bred Pitt va Jonni Depp to‘plangan ovozlar soni bo‘yicha reytingda yuqori o‘rinlarni egalladi, ammo birinchilikni qo‘lga kirita olmadi. Birinchi o‘rinni “Oskar” mukofoti sovrindori, “Shoushenkdan qochish”, “Londonning qulashi”, “Yetti” filmlari yulduzi Morgan Friman oldi.
So‘rovnoma natijalari ListChallenges portalida e’lon qilindi. Reytingga ko‘ra, 87 yoshli aktyor va rejissyor Morgan Friman eng ko‘p, yaʼni 133 ta ovozni qo‘lga kiritgan.
“Matrisa” va “Jon Uik” filmlaridagi rollari bilan tanilgan kanadalik aktyor Kianu Rivz ikkinchi o‘rinni egalladi. Kuchli uchtalikka “Karib dengizi qaroqchilari”, “Alisa mo‘jizalar mamlakatida” va boshqa mashhur filmlarda suratga tushgan aktyor Jonni Depp kiritildi.
To‘rtinchi va beshinchi o‘rinlarga mos ravishda Entoni Hopkins va marhum aktyor Robin Uilyams munosib deb topildi. Qizig‘i shundaki, ovoz berishda ishtirok etgan va birinchi o‘rinlarni egallashi mumkin bo‘lgan ko‘plab mashhurlar reytingda ancha ortda qoldi. Xususan, Bryus Uillis, Hyu Jekman, Leonardo Di Kaprio, Liam Nison, Arnold Shvarsenegger, Silvestr Stallone va boshqalar kamroq ovoz to‘pladi. Mazkur so‘rovnomada jami 150 nafar aktyor nomzodi qo‘yildi. Oxirgi o‘rinni Stiven Sigal egalladi.
Morgan Friman taniqli amerikalik aktyor, rejissyor va prodyuser. Uning karyerasi televideniyeda boshlangan. U 30 yoshida “Salom, Dolli” myuziklida rol o‘ynadi. Biroq aktyor ishtirokidagi bu loyiha muvaffaqiyatsizlikka uchradi. Asta-sekin Frimanning karyerasi va shaxsiy hayoti pasaya boshladi va uni “Ko‘cha yigiti” filmiga taklif qilinganidan keyingina 50 yoshli aktyorning karyerasi nihoyat yaxshilana boshladi. Uning aktyorlik mahorati tanqidchilar tomonidan olqishlandi va Friman 1990-yillarda mashhur aktyorga aylandi. Oradan vaqt o‘tib u “Yetti” va “Shoushenkdan qochish” kabi filmlarda suratga tushdi. Aktyor “Oskar” va Oltin globus mukofotlari bilan taqdirlandi.
Shuningdek, Friman Kristofer Nolanning mashhur “Betmen” trilogiyasida Lyutsius Foks rolini o‘ynagan. Aktyor ko‘plab filmlar qahramonlariga ovoz berishda faol ishlaydi. Filmlardan tashqari, Friman ekologik tashabbuslarni qo‘llab-quvvatlaydi va asalarichilik bilan shug‘ullanadi.
Izoh (0)