7 март куни Netflix стриминг хизматида Пак По Гом ва Айю (Ли Жи Ин) бош ролларни ижро этган “Ҳаёт сенга мандарин берса” номли премераси бўлиб ўтди. Бу йилнинг энг қизиқарли лойиҳаларидан бири бўлиб, у тақдирга қарши чиқиб, муҳаббатни танлаган оддий инсонларнинг ҳаёти ҳақида ҳикоя қилади.
1. Муҳаббат, ҳаёт ва оила ҳақидаги тарихий сага
Дорама болалигиданоқ исёнкор табиатли, китобларга ўч ва шоира бўлишни орзу қилган Э Сун исмли камбағал қиз ҳамда доимо унинг ёнида бўлиб, ҳар жиҳатдан қўллаб-қувватлаб келган камгап йигит Кван Сик ҳақида ҳикоя қилади. Бош қаҳрамонларнинг қиссаси 1960 йилларда Жежу оролида бошланиб, бир неча ўн йиллар давомида ривожланади. Шу боис уни муҳаббат, ҳаёт ва оила ҳақидаги чинакам тарихий сага дейиш мумкин. Дастлабки тўрт қисмнинг ўзидаёқ кўплаб воқеалар рўй беради. Отасининг вафоти, онаси билан мураккаб муносабатлар ва унинг касаллик туфайли бевақт ўлими кичкина Э Сун зиммасига улкан ҳаётий синовларни юклайди ҳамда унинг барча орзу-умидларини аёвсиз воқеликка рўбарў қилади.
Бош қаҳрамонларнинг улғайиши уларнинг ҳаётига нафақат кундалик бозордаги карам савдосини, балки Пусан шаҳрига саргузаштларни ҳам олиб киради. Исёнкор Э Сун ва Квон Сик нима бўлишидан қатъи назар, севгини танлайдилар. Экранларда вазмин оилавий драма, орзу-хаёлларга тўла ёшлик, исён, улғайиш ва самимий муҳаббат ҳақидаги романтик ҳикоя, шунингдек, йиллар давомида ўзгариб борган Жежу оролидаги оддий одамлар ҳаётининг тарихий манзараси намоён бўлмоқда.
2. Пак По Гомнинг кичик экранларга қайтиши
“Ҳаёт сенга мандарин берса” драмаси машҳур корейс актёри Пак Погомнинг кичик экранларга қайтганини тасдиқлади. Унинг қаҳрамони Квон Сик камгап, бироқ ғоятда ғамхўр ва меҳрибон йигит. У бутун умри давомидаги севгилисини ҳимоя қилишга ва доимо қўлидан тутиб юришга тайёр. Баъзида унинг хатти-ҳаракатлари болаларча содда, баъзида ниҳоятда жасур, баъзида эса ақл бовар қилмас туюлади, чунки у ҳар қандай вазиятда ҳам чин юракдан севишини исботлайди. Пак Погом дастлабки тўрт қисмда томошабинлар олдида турли қиёфаларда намоён бўлади: қизил спорт кийимидаги сабзавот сотувчиси ва костюм-шим кийган қочқинидан тортиб, оиласи учун ҳар қандай қийинчиликка бардош беришга тайёр балиқчигача.
3. Айюнинг янги мураккаб роли
Айю (Ли Жи Йин) аввало қўшиқчи сифатида машҳур, бироқ “Продюсерлар”, “Қизил юрак” ва “Дел Луна меҳмонхонаси” сериалларидаги роллари билан у истеъдодли актриса ҳам эканлигини исботлади. “Ҳаёт сенга мандарин берса” фильмида унинг қаҳрамони Э Сун оддий камбағал қиз, аммо мураккаб феъл-атворга эга, оғир даврда яшайди ва ҳаётида турли хил воқеалар рўй беради.
Айю қаҳрамонининг ёрқин образини яратиш учун турли деталлардан фойдаланади. Мисол учун, жуда сергап ва ҳиссиётли Э Суннинг овозида соддалик ва тажрибасизлик оҳанглари сезилади, бу эса унинг саргузаштларга ва ҳатто ақлсиз хатти-ҳаракатларга тайёрлигига зид келади. Оиласи учун ўзини қурбон қилишга тайёр қизнинг фидойилиги, Э Сун бошқа биров унинг фарзанди тақдирини ҳал қилмоқчи бўлганида намоён қиладиган принципиал қатъиятлилик билан ёнма-ён туради.
4. Бир оила тарихига турлича қараш
“Ҳаёт сенга мандарин берса” асари воқеалари узоқ йиллар давомида ривожланиб бориши туфайли бир оила тарихини турли нуқтайи назардан кўрсатиш имкониятига эга. Биринчиси, Э Сун ва Кван Сикнинг ёшлик даври бўлиб, унда шеърият ҳақидаги орзулар, анъаналар ва истакларга зид бўлган севги, ёш ота-оналарнинг фарзанди ёнидаги чин қувонч ва бахтли онлари ҳамда камбағал оиладаги машаққатли ҳаёт тасвирланган.
Иккинчи нуқтайи назар — Мун Со Ри ва Пак Хе Жун ижро этган етук ёшдаги Э Сун ва Кван Сикнинг жўшқин ёшлиги ҳақидаги мулоҳазалари. Улар қайси воқеаларни ҳаётларидаги бурилиш нуқтаси деб билишади, қайсиларини эса фарзандларига айтишни лозим кўришмайди. Дорама кўтарган энг қизиқарли саволлардан бири шуки, бош қаҳрамонлар кўп йиллар олдин қилган танловларидан пушаймон бўлмадиларми? Улар бошқаларнинг маслаҳатига қулоқ солганларида кўпроқ нарсага эришишлари мумкинмиди ёки бу уларнинг ҳаётини янада оғирлаштирган бўлармиди?
Учинчи ракурс — бош қаҳрамонларнинг катта қизи Янг Ким Мёнгнинг қараши бўлиб, бу ролни ҳам Айю ижро этади. Қиз қашшоқлик туфайли болалигида кўп нарсадан маҳрум бўлганини ҳис қилади, бироқ ота-онасининг меҳрини доимо ҳис этган. Онаси каби унинг ҳам ҳаётда янги чўққиларни забт этиш истаги ва интилишлари бор, шунингдек, ота-онаси қабул қилган қарорга нисбатан ўз нуқтайи назари мавжуд. Драма қаҳрамонлари тақдири орқали муаллифлар аёлларнинг доимий ўзгариб бораётган дунёдаги ўрни ҳақида ҳам мулоҳаза юритадилар.
5. Визуал гўзаллик ва давр манзараси
Дораманинг яна бир афзаллиги унинг визуал гўзаллигидир. Сомон сувоқ қилинган қишлоқ уйлари, Чежу оролининг ажойиб соҳили, доимо ҳаёт қайнаётган бозор, буларга қарама-қарши Пусан кўчалари ва барча даврларни қизил ип каби боғлаб турадиган гўзал сариқ майдон кўзни қувонтиради. Қаҳрамонларнинг хилма-хил либослари ва ташқи кўринишлари, шунингдек, экранда тез-тез пайдо бўладиган турли хил эски телевизорлар, болалар велосипедлари, вентиляторлар, пейжерлар ва ўтмишдан қолган бошқа қизиқарли нарсалар эътиборни тортади.
“Ҳаёт сенга мандарин берса” драмаси билан боғлиқ яна бир қизиқарли жиҳат — унинг эфир жадвали. Netflix хизматининг барча серияларни бир кунда чиқарадиган одатий драма кўрсатиш тартиби бу сафар ўзгарди. Ўн олти қисмли драма ҳафтасига тўрт қисмдан эфирга узатилади.
Изоҳ (0)