Bollivud olami doimo go‘zal raqslari, yorqin milliy obrazlari, otashin muhabbat qissalari va betakror qo‘shiqlari bilan bizlarni o‘ziga rom etib kelgan. Ammo bugungi kunda hind kinematografi turli stereotiplardan yiroq bo‘lgan va o‘tkir syujetli filmlarni suratga olmoqda. 2024-yilda ham Bollivud kino sanoati bizga ko‘plab yangi filmlarni taqdim etdi.
“12 muvaffaqiyatsizlik”
Ushbu biografik filmda politsiyachi bo‘lishni orzu qilgan oddiy oilaning farzandi — kambag‘al yigit haqida hikoya qilinadi. U tug‘ilib o‘sgan qishlog‘ini tashlab, imtihondan o‘tish uchun katta shaharga keladi. Ammo taqdir mutlaqo kutilmagan qiyinchiliklarni boshiga soladi. Filmda qalblarga ta’sir qiladigan hikoyalar, inson o‘z orzulari uchun qanchalik uzoqqa borishi haqida o‘ylashga majbur qiladigan voqealardan iborat. Uning har bir daqiqasi kurash va falsafaga to‘la bo‘lib, filmning so‘nggi daqiqalarigacha intrigani ushlab turadi.
“Maharaja”
Mazkur film Netflix’dagi “Maxaraj” nomli loyiha emas. “Maharaja” — butunlay boshqa janr va uslubdagi film. Unda Chennay sartaroshxonasida ishlaydigan oddiy, o‘rta yoshli erkak haqida hikoya qilinadi.
Bir kuni uning uyiga yuk mashinasi uriladi va voqea fojiali tarzda tugaydi: uning rafiqasi Lakshmi vafot etadi. Maharaja va uning qizi Joti birgalikda kun kechira boshlaydi. So‘ng ular qizning omon qolish baxtiga sabab bo‘lgan chiqindi qutisiga Lakshmi nomi berib, unga uydan joy qilib beradi.
Biroq Lakshmini tez orada o‘g‘irlab ketishgach, Maharaja politsiyaga murojaat qiladi. Politsiya birgina chiqindi qutisini izlash uchun qilingan qo‘ng‘iroqni pisand qilmaydi va Maharajani aqldan ozganga chiqaradi. Ammo ular pora olgandan keyingina Maharajaning xazinasini topishga rozi bo‘ladi.
“777 Charli”
Dharma ismli o‘rta yoshli yigit yolg‘iz yashaydi. Kunlarning birida taqdir unga boshpanasiz qolgan labrador iti ko‘rinishidagi kutilmagan sovg‘ani taqdim etadi. Kuchuk Dharmaning uyiga kirib boradi va vaqt o‘tgani sayin uning qalbini zabt eta boshlaydi. Kuchukni veterinar ko‘rigidan o‘tkazilgach, Charli laqabli it tuzalmas kasallikka chalingani ma’lum bo‘ladi. Bu voqea tufayli Dharma to‘rt oyoqli do‘sti bilan Himolay tog‘lariga — vidolashuv ziyoratiga borishga qaror qiladi.
Izoh (0)