Filmda rol o‘ynashni xohlamagan, lekin majbur qilingan Gollivud aktyorlari

Mazkur aktyorlar turli sabablarga ko‘ra ba’zi filmlarda majburan ishtirok etgan.

Daniel Kreyg — “007: Spektr”

Dastlab Daniel Kreyg “Royal kazinosi” filmida Jeyms Bond rolini ijro etishga rozi bo‘lishni istamagan. Biroq Daniel baribir Bondiana qismiga aylandi va uchta filmda suratga tushdi. Kreyg “007: Spektr” nomli to‘rtinchi qismda qatnashishni xohlamagan bo‘lsa-da, shartnoma majburiyatlari tufayli unda o‘ynashga majbur bo‘ldi. Shundan so‘ng Kreyg endi hech qachon Jeyms Bond rolini ijro etmasligini va bundan ko‘ra o‘zini o‘ldirishni afzal ko‘rishini aytdi. Daniel, shuningdek, agar yana Bond rolini o‘ynaydigan bo‘lsa, buni faqat pul uchun qilishini tan oldi. 6 yildan keyin esa Kreyg ijrosidagi Jeyms Bond qissasini to‘liq yakunlagan “O‘lish vaqti emas” filmi ekranlarga chiqdi.

Vupi Goldberg — “Teodor Reks”

90-yillar boshida Vupi Goldberg “Harakat qil, singlim” va “Ruh” kabi filmlarda rol o‘ynab, “Binafsharang gulzor” va “Sakrovchi Jek” filmlaridan keyin erishgan muvaffaqiyatini yanada mustahkamladi. Vupi nihoyatda mashhur aktrisaga aylandi, New Line Cinema studiyasi esa unga hali na syujeti, na rejissyori, na boshqa biror narsasi bo‘lgan filmda rol o‘ynashi uchun besh million dollar to‘lashga tayyor edi. Vupi taklifni qabul qildi, besh millionni oldi va bir muddat o‘tgach, qanday filmda suratga tushishi kerakligini bildi.

Goldberg “Teodor Reks” ssenariysini o‘qigach, filmda qatnashishdan bosh tortdi va o‘sha besh millionni qaytarmoqchi bo‘ldi. Shu payt studiya shartnomani buzgani uchun unga qarshi yigirma million dollarlik da’vo qo‘zg‘atishga tayyorligini ma’lum qildi. Vupi bunday katta summani to‘lolmasdi. Shu bois u taklifni qabul qilishga majbur bo‘ladi va 90-yillarning eng yomon filmlaridan birida rol ijro etdi.

Natali Portman — “Tor 2: zulmat saltanati”

Natali Portman “Leon”, “Qora oqqush”, “Birodarlar” va “Vendetta” kabi mashhur filmlarda rol o‘ynagani sababli uning  “Tor” superqahramonlar filmida qatnashishga rozi bo‘lgani tomoshabinlarni hayratga soldi. Natali uchun bu yaxshi tajriba bo‘lgan bo‘lsa-da, uni takrorlashni unchalik istamasdi. Shu bois “Tor 2: zulmat saltanati” filmidagi rolini takrorlashga faqat filmni ayol rejissyor Petti Jenkins suratga olishini bilganidan keyingina rozi bo‘ldi. Biroq Natali shartnoma imzolaganidan so‘ng, Petti kutilmaganda ishdan bo‘shatildi va uning o‘rniga Alan Teylor tayinlandi.

Portman darhol filmni tark etishga urindi, ammo avvalroq tuzilgan shartnoma tufayli qolishga majbur bo‘ldi. “Tor 2: zulmat saltanati” o‘sha paytda Marvel’ning eng omadsiz filmlaridan biriga aylandi, shuning uchun “Leon” yulduzi uchun bu filmda ishtirok etish puldan boshqa hech qanday ijobiy natija keltirmadi. To‘qqiz yil o‘tgach, Natali yana bir bor “Tor” filmida rol o‘ynadi, biroq bu safar uning roli ancha kengaytirildi — ilgari Jeyn Foster ikkinchi darajali qahramon va “bosh qahramonning sevgilisi” bo‘lgan bo‘lsa, “Tor: muhabbat va momaqaldiroq” filmida u o‘zi superqahramonga aylandi va qo‘liga bolg‘a oldi.

Jennifer Garner — “Elektra”

Jennifer Garner “Perl Harbor” filmi va “Josus” serialida rol o‘ynagan taniqli aktrisa edi. U “Qo‘rqmas” va “Elektra” filmlari uchun shartnoma imzolaydi. “Qo‘rqmas” 2003-yilda ekranlarga chiqdi, ammo kutilgan natijalarni bermadi: 78 million dollarlik byudjet bilan atigi 179 million dollar ishlab topdi. E’tiborli tomoni shundaki, bunday ko‘rsatkichlar studiyani umuman tashvishga solmadi. Aksincha, ular vaziyatdan foydalanib, Jennifer Garnerni “Josus” serialidan olib, “Elektra” filmida rol o‘ynashga majbur qilishdi. Aktrisaning bunga hech qanday istagi yo‘q edi, biroq u “yo‘q” deyolmasdi. Natijada film prokatda muvaffaqiyatsizlikka uchradi va “Qo‘rqmas”ning davomi butunlay yo‘qqa chiqdi.

Chenning Tatum — “Ilon hamlasi”

Yosh va istiqbolli aktyorlar ko‘pincha studiyalar bilan bir nechta filmga shartnoma tuzishadi, ammo keyinchalik bundan afsuslanishadi, chunki bunday kelishuvlar ularning kinodagi tanlovini cheklaydi. “Murabbiy Karter” filmidan so‘ng Paramount studiyasi bilan uchta filmga shartnoma imzolagan Chenning Tatum ham shunday vaziyatga duch keldi. Biroq studiya u bilan faqat to‘rt yildan keyin “Ilon hamlasi” filmi ishlab chiqarilishni boshlaganda bog‘landi. O‘sha paytga kelib Chenning “Oldinga qadam”, “Qoidalarsiz jang” va “Jonni D.” filmlarida suratga tushishga ulgurgan, shuningdek, karyerasini davom ettirishga tayyor edi. Ammo eski shartnoma uning rejalarini buzdi. U tuzoqqa tushganini va hayotidan uch yilni oladigan uchta ishga bog‘lanishga majbur bo‘lganini tushundi. Ularning hech biri “Murabbiy Karter” darajasida bo‘lishi aniq emasdi.

Bred Pitt — “Troya”

Karyerasining cho‘qqisida Bred Pitt Warner Bros studiyasi bilan shartnoma imzolagan bo‘lsa-da, bir safar majburiyatlarini bajarmay, noiloj “Troya” filmining asosiy aktyorlar tarkibiga qo‘shilishga majbur bo‘ldi. Bu ish mashhur aktyorning saralangan filmografiyasiga kirsa-da, uning o‘zi bu filmni yoqtirmaydi. Uningcha, “Troya” tarixida hech qanday jumboq yoki qiziqarli syujet burilishlari yo‘q edi. Buning ustiga, doim kadr markazida bo‘lish unga zavq bermay qo‘ygandi. Shunga qaramay, Pitt “Troya”dan minnatdor ekanligini tan oladi.

Emili Blant — “Gulliverning sayohatlari”

Emili Blant “Qattiqqo‘l xonim” filmida o‘ynagach, uning karyerasi yuksalib, bir yilda uch-to‘rtta filmda suratga tusha boshladi. Muvaffaqiyat cho‘qqisida Emili “Gulliverning sayohatlari” loyihasiga rozilik berdi, ammo ko‘p o‘tmay bu qaroridan afsuslandi. Chunki tez orada unga “Temir odam 2” filmida Natasha Romanoff rolini o‘ynash taklif etildi. Shu ondayoq “Gulliverning sayohatlari” Blant uchun o‘zini ko‘rsatish imkoniyati emas, balki katta franshizaga yo‘l ochishga to‘siq bo‘lib qoldi. Emili “Gulliverning sayohatlari”dan voz kechishga tayyor edi, biroq buning iloji bo‘lmadi va Natasha roli Skarlett Yoxanssonga nasib etdi. Keyinchalik aktrisa Rob Letterman filmidagi ishtirokidan afsuslanganini bir necha bor ta’kidladi, ammo “Temir odam 2”da suratga tusha olmaganidan ko‘proq achinishini aytdi.