Ehtimol, siz ham birinchi maoshingizdan nima olishni oldindan o‘ylagandirsiz. Endi tasavvur qiling, siz Gollivud aktyorisiz va haqiqatda olgan maoshingizga bir nechta nol qo‘shing. Xo‘sh unda nima sotib olgan bo‘lardingiz? Mashhur brend kiyimlarimi? Yoki so‘nggi rusumdagi mashinami?
Quyida dunyoning yetakchi kino yulduzlari o‘zining birinchi gonorariga nima sotib olgani haqida ma’lumot beramiz.
Nikol Kidman
Ishbilarmon Nikol birinchi katta gonorarini havoga sovurmadi, balki ota-onasiga kir yuvish mashinasini sotib oldi. Ammo keyinchalik aktrisa o‘zini ham unutmadi va bir necha juft poyabzalga pul sarfladi, ular Kidmanga “hayotida ko‘rgan eng zo‘r poyabzal” bo‘lib tuyulgan. Hozirda “Oskar” sohibasining boyligi 250 million dollardan oshadi.
Mett Deymon
Gollivuddagi ilk yirik gonorari — 25 000 dollarni Mett 1990-yilda “Chiqayotgan quyosh” telefilmidagi ishtiroki uchun olgan. Bu pullarni u ukasiga mashina sovg‘a qilishga sarfladi, shuningdek, onasiga aspiranturada o‘qishga yordam berdi. “Bu haqiqatan ham ajoyib tuyg‘u edi”, deydi hozirda boyligi 170 million dollarga teng bo‘lgan aktyor.
Killian Myorfi
“Men gramafonga o‘xshash narsa sotib olgan bo‘lsam kerak. Yoki magnitofon, chunki o‘sha paytda gramafonlar hozirgiday zo‘r emasdi”, deya eslaydi Killian o‘zining aktyorlik faoliyatidan olgan birinchi katta gonorari haqida. Bugungi kunda Oskar mukofoti sovrindorining boyligi 20 million dollarni tashkil etadi.
Emili Blant
Emili suratga tushishdan olgan birinchi katta maoshini kvartira ijarasi uchun sarfladi. “Bu ota-onamdan alohida yashash uchun birinchi imkoniyat edi”, deb aytdi bugungi kunda boyligi 80 million dollarga yetgan aktrisa.
Jennifer Eniston
Jennifer faoliyatining boshida juda uzoq vaqt — ikki yildan ortiq — sotuvga qo‘yilgan kichkina oq Mercedes 280 SL mashinasiga qiziqib qarab yurdi. Har safar uni ko‘rganida, bir kun kelib bu chiroyli mashinani sotib olishga qurbi yetishini o‘ylardi.
Oqibatda aynan shu avtomobil aktrisaning ilk yirik xaridi bo‘lib chiqdi. Biroq “Do‘stlar” seriali yulduzi uni atigi bir-ikki marta haydashga ulgurdi, keyin esa u buzildi. Shunday qilib, Enistonning aytishicha, uzoq kutilgan xarid “25 yil avvalgi yoqimli xatoga” aylandi. Ammo bugungi kunda Jen istagan miqdorda Mersedes sotib olishi mumkin — uning hozirgi boyligi 320 million dollardan ham oshib ketgan.
Timoti Shalame
Disney reklamasi uchun olgan birinchi mo‘may daromadini Timoti “Niks” jamoasining mavsumiy chiptalariga sarfladi, ammo keyinchalik bundan afsuslandi. Gap shundaki, bolaligidan Lebron Jeymsning ashaddiy muxlisi bo‘lgan “Dyuna” yulduzi o‘zining sevimli basketbolchisi “Niks” jamoasi uchun Nyu Yorkka kelishiga ishongan edi, biroq oxir-oqibat sportchi boshqa jamoa bilan shartnoma imzoladi. Hozirgi kunda Shalame bunday o‘ylanmagan xarajatlarni bemalol ko‘tara oladi — uning boyligi 20 million dollarga baholanmoqda.
Kirsten Danst
Kirsten suratga tushishni shunchalik erta boshladiki, uning barcha dastlabki pullari shunchaki kollej fondiga ketdi va keyingi bir nechta gonorarlariga u onasiga uy sotib oldi. Aktrisaning hozirgi boyligi 25 million dollarga teng.
Rami Malik
Rami birinchi maoshini o‘zi yaxshi ko‘radigan espresso ichimligini tayyorlash uchun shaxsiy qahva mashinasini sotib olishga sarflagan. Qahva mashinasi uchun ingrediyentlarga “Oskar” g‘olibi bemalol istagancha pul sarflashi mumkin — uning hozirgi boyligi 20 million dollarni tashkil qiladi.
Izoh (0)