Atigi birgina roli bilan karyerasini saqlab qolgan Gollivud aktyorlari

Mazkur aktyorlar o‘z davrida ko‘plab filmlarda rol o‘ynab, olamshumul mashhurlikka erishgan. Ammo turli sabablarga ko‘ra, karyerasini davom ettirmay, biirgina roli bilan tomoshabinlar yodida qolgan.

Brendan Freyzer – “Kit”

Brendan Freyzer 90-yillar oxiridagi eng mashhur yulduzlardan biri bo‘la turib, qanday qilib hamma narsani yo‘qotish mumkinligining yorqin misolidir. O‘sha paytlarda u “Mumiyo”, “Changalzorlik Jorj”, “O‘tmishdan portlash” va “Muzlatilgan kaliforniyalik” kabi filmlarda suratga tushgan, keyinchalik esa “Orzular asiri” va “Mumiya qaytadi” filmlaridagi rollari bilan o‘z muvaffaqiyatini yanada mustahkamlagan.

Janr qoidalariga ko‘ra, Brendan yanada yuqoriroq martabalarga erishishi kerak edi, biroq 2003-yildan boshlab uning hayotida muammolar ketma-ket paydo bo‘la boshladi. Avvaliga u Gollivud xorijiy matbuot uyushmasi raisi Filip Berk bian janjallashib qoladi. Keyin xotini bilan ajrashib, yiliga 600 ming dollarlik aliment to‘lashga majbur bo‘ldi. Buning ustiga sog‘lig‘ida jiddiy muammolar paydo bo‘lib, uni tanib bo‘lmas darajada o‘zgartirib yubordi. Brendan deyarli 15 yil davomida unutildi. Ammo keyinchalik “Kit” filmida Freyzer ajoyib dramatik rolni namoyish etdi. Freyzerning ijrosi uni Gollivudga qaytardi va u “Gulli oy qotillari”, “Bosim”, “Aka-ukalar”, “Tun pardalari ortida” va “Qurbonlik” filmlarida rol o‘ynadi. Taqqoslash uchun, 2014-yildan 2019-yilgacha u hech qanday filmda suratga tushmagan.

Kianu Rivz – “Jon Uik”

80-yillarda Kianu Rivzning “Bill va Tedning ajoyib sarguzashtlari” filmidagi roli komediyadagi iste’dodini ochib berdi va bir necha yil o‘tgach, “To‘lqinlarni bo‘ysundirib, “Drakula”, “Tezlik”, “Iblis advokati” va “Matritsa” filmlari bilan karyerasining cho‘qqisiga chiqdi.

Rivz yulduzga aylandi, katta pul ishlab topdi va jangari aktyor sifatida samarali karyerasini davom ettirishi kerak edi, ammo u ishtirok etgan ko‘plab yangi filmlar muvaffaqiyatsizlikka uchradi. Rivzga endi ishonch qolmagandi, shuning uchun u Jon Uikni yaratganida, o‘z pulini investitsiya qilishga va Chad Staxelski va Devid Litch yanada ko‘proq homiylar topishini kutishiga to‘g‘ri keldi.

Kianu bu filmga ishonardi, shuning uchun sabr bilan kutdi va umid qildi. Bir yarim yil o‘tgach, “Jon Uik” filmi ekranlarga chiqdi va 20-30 million byudjet bilan deyarli 90 million dollar yig‘ib, kichik xitga aylandi. Uning sharofati bilan Rivz yana jangari filmlar yulduziga aylandi.

Jon Travolta — “Jinoiy asar”

Jon Travoltaning faoliyati hech qachon barqarorlik bilan mashhur bo‘lmagan. U yo cho‘qqida edi, yo oziga ham qanoat qilardi. Jon o‘zining birinchi cho‘qqisiga 70-80-yillarda “Tirik qolish” “Shanba oqshomi vasvasasi” va “Briolin” filmlarida suratga tushganida erishgan.

Ammo 1989-yildan keyin u bir pog‘ona pastga tushdi. Besh yil ichida Travolta bir nechta filmlarida rol o‘ynadi. Bu uning darajasi emasdi va ko‘pchilik Travoltani unutib yuborgandi. Biroq u bu haqda tashvishlanmadi, chunki u kichik, kam byudjetli filmlarda rol o‘ynashni xohlardi. Shu maqsadda Vinsent Vega rolini o‘ynash uchun aktyor qidirayotgan Tarantino bilan bog‘landi. Shunisi e’tiborga loyiqki, “Jinoiy asar” uchun Jon “Forrest Gamp”dan voz kechdi va shu bilan Tom Xenksga Gollivudda muvaffaqiyat qozonishga imkon berdi.

Vaynona Rayder — “Juda g‘alati ishlar”

2002-2003-yillarda rejissyor Vudi Allen o‘zining “Melinda va Melinda” filmida bosh rollarga Vaynona Rayder va kichik Robert Daunini taklif qilmoqchi edi, ammo uddasidan chiqolmadi. Chunki aktyorlarni suratga olish davrida sug‘urta qiladigan kompaniyalar Vaynona va Robertni sug‘urta qilishdan bosh tortdi. Rayderning muammosi uning politsiya bilan murakkab munosabatlarida edi: 2001-yilda u kiyim-kechak do‘konidan besh ming dollardan ortiq tovar o‘g‘irlab, qamoqqa tushgandi.

 O‘sha paytda Vaynona “Bitljus”, “Drakula”, “Edvard qaychiqo‘l” va “Kichik ayollar” filmlari orqali tanilgan, ammo u bir necha ming dollar bilan boyib ketishga qaror qilib, hamma narsasini yo‘qotdi. Rayder roppa-rosa 5 yil ishsiz o‘tirishga majbur bo‘ldi. Aktrisa keyinchalik suratga tushishni davom ettirgan bo‘lsa-da, unga muvaffaqiyatli filmlarda bosh rollarni ishonishmadi. U 2016-yilda “Juda g‘alati ishlar” seriali chiqqanidan keyingina mashhurligini tiklay boshladi. Shundan so‘ng Vaynona bir nechta yaxshi filmlarda rol o‘ynadi va hatto 450 million daromad keltirgan “Bitljus Bitljus” filmidagi rolini takrorlashga taklif qilindi.

Kichik Robert Dauni — “Temir odam”

Kichik Robert Dauni voqeasi ko‘pchilikka tanish. Uning ham qonun bilan bog‘liq ba’zi muammolari bor edi, lekin undan ham jiddiyroq. Robert yoshligidagi hayratlanarli muvaffaqiyatidan so‘ng barchasini yo‘qotdi. 1996-yildan beri Robert bir necha bor hibsga olingan, turli shifoxonalarda davolangan.

Syuzan Levin bilan turmush qurgandan so‘ng, kichik Dauni yomon odatlaridan butunlay voz kechdi va kichik qadamlar bilan Gollivudga qaytishni boshladi, ammo buni amalga oshirish oson bo‘lmadi. Ko‘plab prodyuserlar haligacha uni portlashini kutayotgan bomba sifatida ko‘rishadi, chunki Robert bir necha bor butun boshli suratga olish guruhlarini muvaffaqiyatsizlikka uchratgan. Kichik Dauniga faqat rejissyor Jon Favro ishondi, u hammani Robert ularga pand bermasligiga ishontirishga majbur bo‘ldi. U chindan ham pand bermadi. Bundan tashqari, kichik Dauni improvizatsiyalar bilan rolini yaxshiladi va tez orada Marvel yuziga aylandi.

Marlon Brando — “Cho‘qintirgan ota”

Faoliyatining boshida Malon Brando “Orzular tramvayi”, “Yovvoyi” va “Portda” kabi filmlarda muvaffaqiyat qozondi. Tez orada u sifat kafolatiga aylandi va deyarli har bir rejissyor u bilan ishlashni xohladi.

Biroq 60-yillardan boshlab Brando filmografiyasida kassada muvaffaqiyatsizlikka uchragan va tanqidchilar tomonidan qoralangan filmlar ustunlik qila boshladi. Marlon sifat kafolati bo‘lishni to‘xtatdi va suratga olish ishlariga kechikib kelishi, rejissorlar bilan janjallashishi va umuman olganda, juda og‘ir va yoqimsiz odam bo‘lishi bilan o‘z ahvolini yanada og‘irlashtirdi.

Lekin bir kuni rejissyor Frensis Ford Koppola Brandoni o‘zining “Cho‘qintirgan ota” filmida rol o‘ynashga ko‘ndirdi. O‘shanda hech kim Koppologa ishonmagan, shuning uchun film byudjeti atigi 6-7,2 million dollarni tashkil etgan. Ammo prodyuserlar Marlon Brandoga ham ishonishmadi, shuning uchun ular uzoq vaqt davomida uning nomzodini rad etishdi. Frensis hammani ko‘ndirish uchun Brandoning uyiga borib, havaskorlar kamerasiga don Korleone qiyofasida kichik bir sahna ko‘rinishini suratga olishni taklif qildi. Marlon rozi bo‘ldi va jag‘ini buldognikiga o‘xshatish uchun og‘ziga paxta tiqib, barcha prodyuserlarni jim bo‘lishga majbur qilgan ajoyib sahnani namoyish etdi.

Keyingi bir necha yil ichida Brando “Bugungi apokalipsis”, “Parijdagi so‘nggi tango” va “Doktor Moro oroli” filmlarida rol o‘ynadi, ammo bularning barchasi faqat “Cho‘qintirgan ota” filmi tufayli, chunki Marlon rejissyor va prodyuserlarni g‘azablantirishda davom etdi, bu oxir-oqibat uni unutilishga olib keldi.

Ke Xui Kuan — “Hamma joyda va bir vaqtda”

Ke Xui Kuan “Indiana Jons va taqdir ibodatxonasi” filmida o‘ynaganida hali bola edi. Ke aktyorlik faoliyatini davom ettirishga harakat qildi, lekin tez orada Gollivudda osiyoliklar juda ko‘pligini va ular uchun rollar juda kamligini tushundi, shuning uchun u aktyorlikni chetga surib, boshqa yo‘nalishlarni o‘rganishni boshladi: bir muncha vaqt rejissyor yordamchisi va tryuk koordinatori bo‘lib ishladi.

Yillar o‘tib, Kuan yana aktyor sifatida omadini sinab ko‘rdi va bu safar omadi keldi. Ke bosh rollardan birini o‘ynagan “Hamma joyda va bir vaqtda” filmi kichik byudjet bilan 107 million ishlab topdi va “Oskar”dan yettita haykalchani oldi. Ke bu bilan to‘xtab qolmadi — “Loki”, “Elektr shtati” va “Muhabbat - og‘riq” filmlarida rol o‘ynadi.