Muhabbatning ko‘zi ko‘r: Gollivud yulduzlarining iztirobli sevgi hikoyalari

Muhabbat fojialarga olib kelishi, inson taqdirini parokanda qilishi mumkin. Quyidagi muhabbat qissalari buning yorqin dalilidir.

Jon Lennon va Yoko Ono

Amerikalik xonanda va bastakor, The Beatles guruhining sobiq a’zosi Pol Makkartni bir kuni Jon Lennonni notanish yapon rassomi Yokoning avangard ko‘rgazmasiga jo‘natadi. Bunday san’atdan bexabar Lennon ko‘rgan hamma narsalarini bema’ni deb baholaydi. Bunday munosabat mag‘rur rassom ayolni qattiq g‘azablantirdi va... uni sevib qoladi. Ko‘p o‘tmay, Jon mashhur musiqachi va qo‘shiqchiga oshiq bo‘lib qolgan jo‘shqin va shiddatkor yapon ayolining ta’qiblariga duch keldi.

Yoko soatlab Lennonning uyi oldida o‘tirar, uning chiqishini poylar, unga tinimsiz qo‘ng‘iroq qilardi. Musiqachiga do‘q-po‘pisa bilan xatlar yozar, uning oilasini har xil gaplar bilan tahqirlar edi. Bir kuni Jon to‘satdan o‘zi ham o‘jar yapon ayoliga befarq emasligini bilib qoladi. Lennon o‘zini Yoko bilan ruhan yaqin his etadi. Ma’lum bo‘lishicha, ularning qiziqishlari bir xil va ikkalasining ham zamonaviy jamiyatga bo‘lgan qarashlari mos kelardi.

Muhabbat Jon bilan Yokoni xuddi tom ma’noda boshqa shaxsga aylantiradi. Ular hamma vaqt birga bo‘lishar, bir-birlaridan bir daqiqa ham ajralishmasdi. Ehtimol, mashhur kvartetning tez orada tarqalib ketishiga Lennondagi jo‘shqin ehtiros sabab bo‘lgandir. Ammo Jon hech narsani eshitishni istamasdi, u muhabbatdan ko‘r bo‘lib qolgan va sevimli ayolning yonida bo‘lishdan zavqlanib yashardi, to muxlisining mash’um otishmasiga qadar.

Viven Li va Lourens Olivie

Britaniya teatr va kino aktyorlarining eng mashhur juftligi mamlakatning puritan qonunlarini buzib, jamoatchilik fikriga qarshi chiqadi. Ularning ikkalasi ham oilali edi, lekin bu hol Viven Li bilan Lourens Olivening sevishishlariga xalal bermaydi. Viven yolg‘on bilan yashamaslik uchun Times jurnaliga bergan ochiq intervyusida u shaxsiy munosabatlari haqida to‘g‘risini aytadi.

Viven va Lourensning nikohi aktyor juftliklar orasida eng baxtlisi hisoblangan. Biroq tomoshabinlar yulduzlar oilasida aslida nima bo‘layotganini bilishmasdi. Viven erini hurmat qilardi va syomkalar sabab u bilan bo‘lolmasligi depressiya xurujlari bilan yakunlanardi. Turgan gapki, bu oilaviy hayotga og‘ir ta’sir qiladi.

Bir kuni Lourens chidayolmaydi: 17 yillik birgalikdagi hayotdan so‘ng u Vivenni tashlab ketadi. Bu vaqtga kelib, aktrisa og‘ir kasalikka chalingan va sevgilisidan ayrilish fojiani yanada tezlashtirgan edi. Mashhur Skarlett 1967-yilning yozida o‘pka silidan vafot etadi. U umrining oxirigacha faqat bitta odamni — Lourens Olivyeni sevib o‘tadi.

Kianu Rivz va Jennifer Saym

Ular muhabbat va hamjihatlikda uzoq va baxtli yashashni orzu qilishardi. Lekin Kianu va Jenniferning boshiga og‘ir musibat tushadi: tug‘uruqdan bir hafta oldin hali ona qornidaligidayoq qizi vafot etadi. Albatta, buni boshdan kechirish nihoyatda og‘ir edi.

Kianu bir amallab o‘zini qo‘lga oladi, ammo Jennifer azobda qoladi. Qizini yo‘qotish dardini bosish uchun u ichkilik va giyohvand moddalardan tasalli izlaydi. Hammasi fojiali yakunlanadi: bir yil o‘tgach, Jennifer avtohalokatda vafot etadi. Kianu sevgan ayolining xotirasini hanuzgacha qalbida saqlaydi, lekin bu haqda hech qayerda va hech kimga og‘iz ochmaydi.

Elizabet Teylor va Richard Barton

Elizabet va Richardning muhabbati Dostoyevskiyning “Aka-uka Karamazovlar” asarida tasvirlangan ehtiroslarga o‘xshardi. Aqldanozar darajadagi his-tuyg‘ular, kutilmagan xatti-harakatlar... Ular bir-birlariga oshiq-u beqaror bo‘lib, go‘yo oilaning mavjudligini, ularning xatti-harakatlarini yoqtirmaydigan Gollivud jamiyatining fikrini unutib qo‘yishgandi.

Richard Barton Elizabet Teylor bilan uchrashishdan oldin aktrisa Sibil Uollesga uylangan va ikki farzandi bor edi. Elizabet esa qo‘shiqchi Eddi Fisher bilan turmush qurgandi. Hammasi Teylor Misr malikasi rolini o‘ynagan va Barton uning partnyori bo‘lgan “Kleopatra” filmini suratga olishdan boshlanadi. Taqdir taqozosi bilan unga Kleopatraga telbalarcha oshiq bo‘lgan va uning uchun o‘limga rozi bo‘lgan Mark Antoniy roli nasib etadi.

Ular ataylab sevgi olovida yonayotgandek edilar: janjallar, ayriliqlar, mushtlashuvlar. Har bir janjaldan keyin Richard Barton yarashish belgisi sifatida Elizabetga brilliantlar sovg‘a qilardi. U bag‘rikeng, saxiy, shu bilan birga, nihoyatda qiziqqon va tajovuzkor erkak edi. Elizabet ham unga munosib edi. Bunday munosabatlar uzoq davom etishi mumkin emasdi...

Ikki marta ayriliq va ikki qayta nikohdan so‘ng, ular oxir-oqibat bir umrga ajralishadi. Richard Bartonning o‘limi haqidagi xabar Elizabet uchun dahshatli zarba bo‘ladi. U birdan undan-da yaqinroq va sevikliroq erkak aslida hech qachon bo‘lmaganini tushundi.

Jennifer Eniston va Bred Pitt

Sevgilisi bilan yetti yil birgalikdagi hayotdan so‘ng Eniston oiladagi o‘z o‘rnini boshqa ayolga bo‘shatib berishga majbur bo‘ldi. Filmlarda ko‘rinadigan kuchli, jasur Bred esa Anjelina Jolining jozibasiga zarracha qarshilik ko‘rsatolmaydi. Aytishlaricha, u hatto Eniston pishirgan go‘shtdan voz kechib, vegetarian bo‘lib qolgan ekan.

Jennifer bu zarbadan o‘zini o‘nglab olishga qanchalik urinmasin, uning xatti-harakatlarida faqat bitta odamni — Bred Pittni sevgan oldingi paytlardagi qayg‘u-hasrat sezilib turadi. Shu sababli bo‘lsa kerak, aktrisaning shaxsiy hayotida hamon omadi yurishmayapti: u hozircha ko‘nglidagi erkakni uchratgani yo‘q. Darvoqe, Bred ham Anjelina bilan oilaviy baxt topa olmadi: taqdir undan qasos olgandek, hozirda sobiq rafiqasi bilan sudlashib yuribdi.

Mariyon Kotiyar va Jyulen Rassam

Mariyon — jahon kinosining eng maftunkor aktrisalaridan biri, “Oskar” mukofoti sovrindori. Ziyoli, mehribon, aqlli qiz yuksak muhabbat haqida hikoya qiluvchi romanlarni ko‘p o‘qirdi, bu tuyg‘u uchun odamlar ba’zan o‘zlarini qurbon qilib, olijanob ishlar qilishadi. Ko‘p o‘tmay u o‘z shahzodasi Jyulen Rassam bilan uchrashadi. To‘g‘ri, Mariyonning tanishlari va do‘stlari uni bu muhabbat yaxshilik keltirmasligidan ogohlantirishgandi. Jyulen iste’dodli aktyor bo‘lsa-da, ruhiy xastalik va giyohvandlikka moyillikdan aziyat chekardi.

Mariyon o‘zining fidokorona muhabbati bilan sevgilisini qutqarishga, unda hayotga bo‘lgan qiziqishni uyg‘otishga harakat qiladi. Ammo hammasi behuda ketadi. O‘z joniga qasd qilishga moyil bo‘lgan Jyulen bir kuni uning ko‘z o‘ngida o‘zini derazadan tashlaydi. U halok bo‘lmaydi, lekin bir umrga nogironlar aravachasiga mixlanib qoladi. Mariyon yana sevgilisiga mehribonlik bilan g‘amxo‘rlik qiladi, mo‘jiza yuz berishiga va hammasi yaxshi tomonga o‘zgarishiga umid qiladi va ishonadi. Biroq ikki yildan so‘ng Jyulen baribir joniga qasd qiladi...

Uning o‘limi Mariyonni shunchalik larzaga soladiki, u uzoq vaqt davomida oilaviy baxtni ozgina bo‘lsa ham eslatuvchi vaziyatlardan qochib yurdi. Keyinchalik Kotiyar Giyom Kanyega turmushga chiqdi va hozirda ularning ikki farzandi bor.