Britaniyalik aktyor va rejissyor Entoni Hopkins ilk bor o‘z xotiralari bayon etilgan avtobiografik asarini yozdi. Kitobning anonsi e’lon qilingan video aktyorning Instagram sahifasida e’lon qilindi.
“Oskar” mukofoti sovrindori, 87 yoshli aktyor asarini “We did it ok, kid” (“Biz buni uddaladik, bolakay”) deb nomladi. Kitobning taqdimot sanasi 2025-yil 4-noyabrga belgilangan bo‘lib, u AQSH, Buyuk Britaniya, Avstraliya va Hindistonda sotuvga chiqariladi.
Asar menga manzur bo‘ldi, o‘ylaymanki, sizga ham yoqadi, deydi Hopkins videoda.
Britaniya OAV ma’lumotlariga ko‘ra, avtobiografiyada Hopkins o‘zining bolaligi, aktyorlik san’atiga kirib kelishi, karyerasining muhim bosqichlari va shaxsiy hayotidagi qiyinchiliklar haqida hikoya qiladi. Shuningdek, unda aktyorning alkogolizm bilan kurashi va uni yengish jarayoni ham ochiq-oydin tasvirlagan. Kitobda Hopkinsning shaxsiy fotosuratlari ham joy olgan bo‘lib, ular o‘quvchilarga aktyorning hayotiga yanada yaqinroq nigoh tashlash imkonini beradi.
“Biz buni uddaladik, bolakay” audiokitob shaklida ham chiqadi va unga aktyorning o‘zi ovoz berdi.
Hopkins faoliyati davomida 140 ta film va seriallarda suratga tushgan. Jumladan, “Qo‘zilar sukunati”, “Gannibal” va “Qizil ajdarho” filmlarida tasvirlangan doktor Gannibal Lekter obrazlari mashhur. Aktyorning boshqa taniqli obrazlari orasida “Sehr”, “Fil odam”, Brem Stokerning “Drakula”si, “Kun qoldiqlari”, “Soyalar mamlakati”, “Kuz afsonalari”, “Nikson”, “Amistad”, “Zorro niqobi”, “Tanishing, Jo Bleyk”, “Tor”, “Tor: zulmat saltanati”, “Transformerlar: so‘nggi ritsar”, “Ota” filmlari ham o‘rin olgan.
Entoni Hopkins 2000-yildan beri AQSHda istiqomat qiladi. 2003-yilda aktyor Gollivud shon-sharaf xiyobonida o‘z yulduziga ega bo‘ldi, 2008-yildan esa Britaniya kino va televideniye san’ati akademiyasining a’zosi etib saylandi. 2021-yilda u “Ota” filmidagi bosh roli uchun ikkinchi marta “Oskar”ni qo‘lga kiritdi va ushbu mukofotga eng keksa (83 yosh) nomzod sifatida tarixda muxrlanib qoldi.
Izoh (0)