Qozog‘iston sobiq prezidenti Nursulton Nazarboyevning Rossiya prezidenti Vladimir Putin bilan uchrashuvi AQSHda tayyorlanayotgan “Qozoqgeyt-2” jinoiy ishi bilan bog‘liq bo‘lishi mumkin. Qozog‘istonlik deputat Yermurat Bapi tegishli fikrni ilgari surdi.
Mening ma’lumotlarimga ko‘ra, Amerika Qo‘shma Shtatlarida “Qozoqgeyt-2” nomi bilan yangi ulkan janjal yetilmoqda. Amerika Qo‘shma Shtatlar Adliya vazirligi ilgari AQSH fuqarolari, kompaniyalari, sug‘urta tashkilotlari va hatto ekspertlari xizmatidan foydalangan dunyo kleptokratlariga qarshi yangi jinoiy ish tayyorlamoqda. Agar bu kleptokratlar bir vaqtlar Amerika Qo‘shma Shtatlar subyektlari xizmatidan foydalangan bo‘lsa, ularga nisbatan jinoiy ish qo‘zg‘atiladi. Menda shunday ichki ma’lumot bor, dedi deputat.
U agar sobiq rahbar muayyan mamlakatning milliy qonunlarini buzgan bo‘lsa, hech qanday kafolat qutqara olmasligini aytdi.
Menimcha, bu urinishlar, ya’ni sobiq prezident Nursulton Nazarboyevning Putin bilan uchrashish uchun Kremlga, Moskvaga tashrifi va Qozog‘iston Respublikasining davlat sirlari to‘g‘risidagi qonuniga yangi qoida kiritilishi — bularning bari kutilayotgan xalqaro janjalga bog‘liq. Biz faqat Pandora qutisi qachon ochilib, aniqrog‘i portlab ketishini kutishimiz kerak bo‘ladi, dedi Bapi.
14-dekabr kuni Rossiya prezidenti Vladimir Putin o‘zining Novo-Ogaryovodagi qarorgohida Qozog‘iston sobiq prezidenti Nursulton Nazarboyevni qabul qilgani ma’lum bo‘ldi. Biroq uchrashuv tafsilotlari haqida hech qanday ma’lumot berilmadi.
“Qozoqgeyt” — 1990-yillarning oxiri va 2000-yillarning boshida yuz bergan xalqaro korrupsiya mojarosi bo‘lib, u Qozog‘istondagi yuqori darajadagi korrupsiya ayblovlari bilan bog‘liq edi. Bu ayblovlarga ko‘ra, G‘arb neft kompaniyalari qozog‘istonlik amaldorlarga neft konlariga kirish uchun pora bergan, deb KazTAG xabar bermoqda. Ishning asosiy ayblanuvchisi amerikalik bankir va huquqshunos Jeyms Giffen edi.
Izoh (0)