Qashqadaryo viloyatida faoliyat yuritgan sobiq hokimlardan biri 75 yoshli Yazdurdi Safarov “Daryo” muxbiri bilan suhbatda O‘zbekistonning Birinchi prezidenti Islom Karimov haqida gapirib berdi.
Qashqadaryoning sobiq Bahoriston (ayni kundagi Mirishkor) tumanida 1991—1995-yillarda rahbarlik qilgan Yazdurdi Safarov, marhum prezident Islom Karimov O‘zbekiston prezidenti sifatida ish boshlaganidan avval ham u bilan birga faoliyat yuritganini, Islom Karimov qattiqqo‘l rahbar bo‘lish bilan birga, qo‘l ostidagilarni himoya qilishga odatlanganini ham aytib o‘tdi.
“Islom aka O‘zbekiston prezidenti sifatida ish boshlagan paytlar, adashmasam 1992—1993-yillar edi. Qashqadaryoda Temir Xidirov rahbarlik qilardi. O‘sha paytda yozuv-chizuv bo‘lgani sabab Islom aka viloyatga keldi. Hamma rahbarlar bilan uchrashuv o‘tkazayotgandi. Biz yozuv-chizuv sabab viloyat rahbari ishdan olinsa kerak deb turgandik. Shunda Islom aka ‘men aslida viloyat hokimini ishdan olish uchun kelmadim. Qashqadaryoda birov yarim ifloslar bor edi, ko‘payibsizlar’, — dedi. Shunda Soyib Xo‘jayev degan oqsoqolimiz o‘rnidan turib, ‘Islom aka, Qashqadaryoda bunday iflos kimsalar yo‘q’, dedi.
O‘sha paytdagi Kitob rayonining hokimi Ozod Farmonov qo‘l ko‘tarib so‘z so‘radi. Islom aka unga o‘tir, gapirmaysan dedi. Shunda Ozod Farmonov minbarga chiqib, fikr bildirish niyati borligini aytdi. Islom aka, ruxsat bergach, Ozod aka so‘zga chiqdi. Biz shunda Ozod akaga qoyil qolganmiz. Biz oyoq-qo‘limiz qaltirab, so‘z bermasin deb tursak, Ozod akaning o‘zi so‘z so‘rab, minbarga chiqdi.
Ozod Farmonov minbarda Islom akaga yuzlanib, ‘Islom aka, Qashqadaryoda biror bir gap bo‘lsa, yarim soatdan so‘ng respublikada muhokama bo‘ladi, siz atrofingizdagilarni tartibga chaqiring’, dedi. Shunda men obbo Ozod aka bu gaplarni Islom akaga qanday aytyapti ekan, deb qoyil qolgandim. Shundan so‘ng Islom Karimov Qashqadaryoning o‘sha paytdagi rahbari Temir Xidirovni ishdan olmay, markazga qaytgandi”, — dedi Yazdurdi bobo Safarov Islom Karimov bilan bog‘liq xotiralarni yodga olar ekan.
Sobiq hokim birinchi prezidentning jismonan baquvvat bo‘lganini aytib o‘tdi.
“Islom aka bilan birga yurib, yetolmasdik. Jismonan juda baquvvat inson edi. Oddiy misol. O‘sha paytda dalalarda yuzlik lotok bo‘lardi. Islom aka o‘sha lotokka bir qo‘lini qo‘yib, sakrab o‘tardi. Biz esa avval lotokka chiqardik, so‘ngra lotok ichiga kirib, keyin oshib o‘tardik. U kishi esa ortiga ham qaramay, miyig‘ida kulib qo‘yardi. Tuproq, loy kechib ishini davom ettirib ketardi. Toshkentdan kelgan mehmonlar ham u kishining ortidan yurishga qiynalardi. Shunda Islom aka, Toshkentdan kelgan mehmonlar Qashqadaryoda yashash, ishlash qanday qiyinligini bilsin, ko‘rsin derdi”, — deydi sobiq Bahoriston tumanining sobiq hokimi Yazdurdi Safarov.
Izoh (0)